«Արաբական աշխարհի փառատոն»-ին ելոյթ է ունեցել Պարգեւ
Թասլաքյանի ղեկավարած «Թայհա» լիբանանեան երգչախումբը
19-11-2009 18:40:00 | Կանադա | Մշակոյթ
ՄՈՆՐԵԱԼ, 19 ՆՈՅԵՄԲԵՐԻ, ՆՈՅԵԱՆ ՏԱՊԱՆ - ՀԱՅԵՐՆ ԱՅՍՕՐ:
Հոկտեմբերի 30-ից նոյեմբերի 15-ը Մոնրեալում կայացել են համերգներ`
«Արաբական աշխարհի փառատոն» ծրագրով, որոնց մասնակցել են արաբական
տարբեր երկրներից ժամանած խմբեր, երգիչներ ու արուեստագէտներ: Արդէն
10-րդ տարին կազմակերպւող այս փառատոնը Հիւսիսային Ամերիկայում
անցկացուող ամենամեծ փառատոնն է համարւում:
Ինչպէս տեղեկացնում է «Ազդակը», փառատոնի այս տարուայ ծրագրում,
նոյեմբերի 15-ին Մոնրեալի արուեստի կենտրոնի սրահում ելոյթ է
ունեցել Լիբանանի «Ֆայհա» երգչախումբը` Պարգեւ Թասլաքյանի
ղեկավարութեամբ: Թերթից տեղեկանում ենք, որ «Ֆայհայի» երկու ժամ
տեւած համերգը կախարդել է կանադացի, արաբ ու հայ 1500
արուեստասէրներին: Ծրագրում տեղ են գտել Ռահպանի եղբայրների, Բարսեղ
Կանաչյանի, Զաքի Նասիֆի, Կոմիտասի եւ արաբական ազգագրական ու
ժամանակակից երգերը: Բացառիկ ներկայացումներով հանդէս են եկել
մենակատաներ Ռոլա Աբու Բաքրը, Մայեն Զաքարիան եւ Ռեբեկա Տիպը:
Նրանց նվագակցել է հրաւիրուած դաշնակահար Խաչատուր Ղազարեանը:
Կանադացի սոպրանո Ռիտա Սաղպազարյանը կատարել է բարսեղ Կանաչյանի
«Օրորը»: Երգերի դաշնամուրային մեկնաբանութիւնը կատարել է
երաժշտագետ Էդուարդ Թորիկյանը:
Համերգն աւարտուել է Ռահպանի եղբայրների` Երուսաղեմին նուիրուած
«Քաղաքների ծաղիկը» երգով, որի եզրափակիչ բաժնի «Ալելույա» եւ
«Աստուած մեծ է» կատարումները հանդիսատեսը ունկնդրել է յոտնկայս:
«Ազդակը» տեղեկացնում է նաեւ, որ 2005-ին «Ֆայհա» երգչախումբը
Վարշավայում, Երգչախմբերի միջազգային փառատոնում երկրորդ մրցանակ է
ստացել, իսկ 2007-ին նուաճել է առաջին մրցանակը: