Հայաստանի 2010թ.-ի պետբիւջէի նախագծով Արտգործնախարարութեան
պահպանման ծախսերի համար նախատեսուած է 885,2 մլն դրամ
05-11-2009 18:38:00 | Հայաստան | Տնտեսութիւն
ԵՐԵՎԱՆ, 5 ՆՈՅԵՄԲԵՐԻ, ՆՈՅԵԱՆ ՏԱՊԱՆ: Հայաստանի 2010թ.-ի
պետբիւջէի նախագծով ՀՀ արտգործնախարարութեան ֆինանսավորումն
իրականացուելու է 4 հիմնական ուղղութիւններով. ապարատի պահպանման
ծախսեր` 855,2 մլն դրամ, ՀՀ դեսպանութիւնների եւ
ներկայացուցչությունների պահպանման ծախսեր` շուրջ 4, 67 մլրդ դրամ,
ԱԳՆ-ի աշխատակազմի «Պետական արարողակարգի ծառայութիւն»
գործակալութեան պահպանման ծախսեր` 123 մլն դրամ, միջազգային
կազմակերպություններին Հայաստանի անդամակցութեան վճարներ` 1,07
մլրդ դրամ: Այս մասին ՀՀ Ազգային Ժողովի մշտական յանձնաժողովների
նոյեմբերի 5-ի համատեղ նիստում յայտնեց ֆինանսների նախարարի առաջին
տեղակալ Պաւել Սաֆարեանը:
Ըստ նրա, ԱԳՆ-ի պահպանման 2010թ.-ի ծախսերը ձեւաւորուել են
2009թ.-ի սկզբունքով: Սակայն, հաշուի առնելով դիւանագիտական երկու
լրացուցիչ հաստիքների անհրաժեշտութիւնը, 2009թ.-ի համեմատ ծախսերն
աւելացուել են շուրջ 2 մլն դրամի չափով:
Նշուեց նաեւ, որ ՀՀ դեսպանութիւնների եւ
ներկայացուցչությունների պահպանման ծրագրով նախատեսուած
ֆինանսավորումն ենթակայ է վերանայման, ինչը պայմանաւորուած է
դրամ/եւրօ եւ դրամ/ԱՄՆ դոլար փոխարժեքների փոփոխութեամբ: ԱԳՆ-ի
խնդրանքով ներկայումս տարւում են աշխատանքներ, որոնց նպատակն է
աւելացնել այս ծրագրով ֆինանսավորումն այնքան, որպէսզի արտերկրում
Հայաստանի դիւանագիտական կորպուսի ամսական աշխատավարձերի չափերը
համապատասխանեցվեց 2009թ-ի մակարդակին: Արտերկում 2010թ.-ին նոր
դեսպանութեան բացման ծրագիր նախատեսուած չէ:
«Պետական արարողակարգի ծառայութիւն» գործակալութեան
պահպանման ծախսերը 2009թ.-ի նկատմամբ նուազել են շուրջ 17,3 մլն
դրամով, այդ թւում, գործուղումների եւ շրջագայությունների ծախսերի
մասով` 14,3 մլն դրամով, կապի ծառայութիւնների մասով` 3 մլն
դրամով:
Միջազգային կազմակերպություններին Հայաստանի անդամակցութեան
վճարների համար նախատեսուած 1,07 մլրդ դրամից 832 մլն դրամն
ուղղուելու է 76 միջազգային կազմակերպություններին անդամավճարների
գծով ընթացիկ պարտաւորութիւնների կատարմանը, իսկ 239 մլն դրամը`
նախորդ տարիներին կուտակուած պարտքերի մարմանը:
Ինչպէս յայտնեց Պ.Սաֆարեանը, 5-6 տարի առաջ Հայաստանի արտաքին
պարտավորություններն անհամեմատ աւելի մեծ էին եւ 19-20 մլն ԱՄՆ
դոլարի էին հասնում: Այնուհետեւ միջազգային կազմակերպութիւնների
եւ ՀՀ ԱԳՆ-ի «ինտենսիվ, արդիւնաւէտ աշխատանքի շնորհիւ համատեղ
մշակուեցին պարտաւորութիւնների մարման ժամանակացույցեր»: Նշուեց, որ
այսօրուայ դրութեամբ պարտաւորութիւնների գումարը կազմում է 8,47 մլն
ԱՄՆ դոլար, եւ վերակնքված ժամանակացոյցի համաձայն, Հայաստանը
պարտաւոր է 2010թ.-ին այնքան գումար, ինչքան որ նախատեսուել է
պետբիւջէի նախագծով:
Բիւջէի նախագծի հիմքում դրուած է 1 ԱՄՆ դոլարի դիմաց 376 ՀՀ
դրամ հաշուարկային փոխարժեքը: