Հարյուրից աւելի սփիւռքահայ ճարտարապետներ արդէն իրենց
ներուժն են ներդնում Հայաստանում իրականացyող նախագծերում
28-10-2009 21:30:00 | Հայաստան | Հասարակութիւն
ԵՐԵՎԱՆ, 28 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Չինաստանի Շանհայ
քաղաքում յաջորդ տարի անցկացուելիք «EXPO-2010» միջազգային
ցուցահանդէսում Հայաստանը ներկայանալու է «Աշխարհի քաղաք» վիրտուալ
ծրագրով: Հայաստանի վարչապետի յանձնարարութեամբ սփիւռքահայ
ճարտարապետներին արդէն իսկ առաջադրուել է ըստ եւրոպական, պարսկական,
ամերիկեան եւ այլ թաղամասերի քաղաք նախագծելու ծրագիր: Այս մասին
Ազգային ժողովի հերթական նիստում` «ՀՅԴ» խմբակցութեան անդամ
Ռուզաննա Առաքելեանի հարցին ի պատասխան, յայտնեց Հայաստանի
սփիւռքի նախարար Հրանուշ Յակոբեանը:
Նա տեղեկացրեց նաեւ, որ կառավարութիւնում կայ գաղափար, բայց
ոչ վերջնական որոշում` «EXPO-2010»-ում այդ նախագծի յաջողութեան
դէպքում, քաղաքը կառուցել Հայաստանում` Մասիսի ստորոտում, Խոր
Վիրապի շրջակայքում: Միեւնոյն ժամանակ նախարարը վստահեցրեց, որ
Աշխարհի քաղաք հիմնելու դէպքում որեւէ ճարտարապետական կամ
հնագիտական կառոյցի վնասելու հաւանականութիւնը կբացառուի: «Տայ
Աստուած, որ գայ այդ օրը, եւ այդ քաղաքը կառուցուի` որպէս շատ
հետաքրքիր գաղափար եւ նորույթ, որպէս շնորհակալութիւն բոլոր այն
երկրներին, որոնք դռները բացել են եւ մեր հայ ժողովրդին ընդունել
են իրենց երկրներում»,- ասաց սփիւռքի նախարարը:
Նա տեղեկացրեց նաեւ, որ սփիւռքահայ 150 ճարտարապետների
ներուժը ներկայումս օգտագործւում է Հայրենիքի կողմից առաջադրուած
այլ խնդիրներում եւս, մասնաւորապէս, Երեւան քաղաքի կառուցապատման
աշխատանքներում: Ըստ նրա, տարբեր երկրների հայ ճարտարապետներ
նախագծային առաջարկներ են ներկայացնում Հայաստանի
կառավարութեանը: