ԵՐԵՎԱՆ, 27 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: 2009թ.-ի 9 ամիսներին
Հայաստանում գրանցուել է տնտեսական գործունէութեան դէմ ուղղուած 652
հանցագործութեան դէպք` նախորդ տարուայ նոյն ժամանակահատուածի 313-ի
դիմաց: Այս մասին հոկտեմբերի 27-ի ասուլիսում յայտնեց ՀՀ
Ոստիկանութեան Կազմակերպուած յանցաւորութեան դէմ պայքարի գլխաւոր
վարչութեան պետ Յունան Պողոսեանը;
Ըստ նրա, նշուած ժամանակահատուածում հանրապետութիւնում
գրանցուել է կոռուպցիոն բնոյթ կրող 398 հանցագործութիւն` նախորդ
տարուայ 288-ի դիմաց: Դրանցից 22-ը պաշտօնական դիրքի օգտագործմամբ
իւրացման կամ վատնման (նախորդ տարի` 9), 58-ը` խոշոր չափով
իւրացման կամ վատնման (նախորդ տարի` 11), 96-ը` հարկերը վճարելուց
չարամտօրէն խուսափելու (նախորդ տարի` 104), 63-ը պաշտօնական
կեղծիքի (նախորդ տարի` 38) դէպքեր են:
Նոյն ամիսներին բացայայտուել է դրամանենգութեան 6 դէպք,
պաշտօնական լիազորութիւնները չարաշահելու 71, կաշառակերութեան 46
դէպք: Յայտնաբերուել են տնտեսական բնոյթի հանցագործությունների
շարքին դասվող, սեփականութեան դէմ ուղղուած հանցատեսակ հանդիսացող
իւրացման 147 դէպքեր` նախորդ տարուայ 63-ի դիմաց: