Արմէն Յարութիւնեյանը կոչ է անում սեփական իրաւունքների համար
պայքարել սեփական երկրում
23-10-2009 18:24:00 | Հայաստան | Մարդու իրաւունքներ
ԵՐԵՎԱՆ, 23 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Արդէն պատրաստ է
Հայաստանի Մարդու իրաւունքների պաշտպան Արմէն Յարութիւնեանի
արտահերթ զեկոյցը, որը վերաբերում է արդար դատաքննութեան
իրաւունքին: Այն առաջիկայ երկու շաբաթուայ ընթացքում կներկայացուի
հանրութեանը: Յայտնելով այս մասին հոկտեմբերի 23-ի ասուլիսում,
Պաշտպանը նշեց, որ բացարձակապէս բաւարարուած չէ Հայաստանում արդար
դատաքննութեան իրաւունքի պաշտպանութեան վիճակով: Ի դէեպ, Պաշտպանի
հաստատութեան հետ չհամագործակցող մարմինների ցանկում առաջինը
դատախազութիւնն է:
Ա.Յարութիւնեյանը գոհունակութիւն յայտնեց, որ աւելի քան մէկ
տարուայ գործունէութիւնից յետոյ յաջողուել է հասնել նրան, որ Լեռնային
Ղարաբաղի Մարդու իրաւունքների պաշտպանը դարձել է Եւրոպական
օմբուդսմանի ինստիտուտի լիիրաւ անդամ, իսկ ՀՀ Մարդու իրաւունքների
պաշտպանը` առաջին անգամ Հարաւային Կովկասի պատմութեան մէջ, ընտրուել
այդ մարմնի ղեկավար խորհրդի անդամ:
Իր գլխաւորած հաստատութեան գործունէութեան դրական
արդիւնքներից Ա.Յարութիւնեյանը, մասնաւորապէս, նշեց 39 ընտանիքի`
105 հոգու, սեփականութեան իրաւունքի վերականգնումը: Ըստ նրա,
Երեւանի Հիւսիսային պողոտայի նախկին բնակիչների գործերը
վերջիններիս համար յաջող ընթացք են ունենում: «Հիւսիսային պողոտան
ժամանակին մի մեծ պրոյեկտ էր մարդկանց սեփականութիւնը շատ էժան
գներով վերցնելու եւ դրա տակ քողարկված բիզնես անելու` հանրային
շահերի անուան տակ»,- յայտարարեց Ա.Յարութիւնեյանը: Յիշեցնելով, որ
պողոտայի հուսալքված բնակիչներից մէկը յայտարարել էր, թէ քաղաքական
ապաստարան է խնդրելու Թուրքիայում, Պաշտպանը կոչ արեց սեփական
իրաւունքների համար պայքարել սեփական երկրում:
Իսկ ինչ վերաբերում է Թուրքիային, ապա Ա.Յարութիւնեյանը
յայտնեց, որ Թուրքիան Եւրոպական դատարանում իր դէմ ամենաշատ
վճիռներ եւ խախտումներ ունեցող երկրներից մէկն է: Բացի այդ,
Թուրքիայում չկայ մարդու իրաւունքների պաշտպանի ինստիտուտ, եւ
վերջերս միայն Թուրքիայի վարչապետը յայտարարել է, որ անհրաժեշտ է
օր առաջ ստեղծել այդ ինստիտուտը: