ՓԱՐԻԶ, 20 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ - ՀԱՅԵՐՆ ԱՅՍՕՐ: Կոմիտասի ծննդեան 140-ամեակին նուիրուած շաբաթը Ֆրանսիայում աւարտուել է հոկտեմբերի 18-ին Փարիզի հռչակաւոր Գավո սրահում տեղի ունեցած մեծ համերգով: Համերգին ներկայ էին Ֆրանսիայի մշակոյթի նախարար Ֆրեդերիկ Միտերանը, Հայաստանի մշակոյթի նախարար Յասմիկ Պողոսեանը, Ֆրանսիայի քաղաքական, հասարակական, գիտութեան ու մշակոյթի գործիչներ, նշանաւոր անհատներ: Կոմիտասի գործերի կատարմամբ հանդէս են եկել դաշնակահար Սւետլանա Նաւասարդեանը, երգիչներ Բարսեղ Թումանյանը (բաս), Ջուլիետա Գալստեանը (մեցցօ-սոպրանո) եւ Յասմիկ Թորոսեանը (սոպրանո), «Նաիրի» խումբը` Հայկ Դաւթեանի ղեկավարութեամբ (Ֆրանսիա), «Արպեջիոն» քառեակը (Ֆրանսիա): Համերգի առանցքն է կազմել Հայաստանի պետական կամերային երգչախմբի ելոյթը` Ռոբերտ Մլքեյանի ղեկավարութեամբ, որի ընթացքում կատարուել են Կոմիտասի հարսանեկան ու գեղջկական երգեր ու պարեր, ինչպէս նաեւ Կոմիտասի տաղերի հիման վրայ կոմպոզիտոր Արթուր Ահարոնեանի յատուկ այս առիթով գրած «Մենավոր» երգերի շարքը: Ինչպէս յայտնում են ՀՀ ԱԳՆ Մամուլի եւ տեղեկատուութեան վարչութիւնից, Կոմիտասի ծննդեան 140-ամեակին նուիրուած շաբաթն սկսուել էր հոկտեմբերի 13-ին, Փարիզի Աշխարհի մշակոյթների տանը տեղի ունեցած դասախոսութիւն-համերգով, որի ընթացքում երաժշտագետներ Մհեր Նաւոեանը (Հայաստան) եւ Անտոնի Ժիրարը (Ֆրանսիա) ներկայացրել են Կոմիտասի կեանքն ու ստեղծագործութիւնը, նրա դերը հայ ազգային եւ համաշխարհային երաժշտութեան զարգացման մէջ: Հոկտեմբերի 15-ին Կոմիտասի գործերը հնչել են Փարիզի Ինվալիդների Սեն-Լուի տաճարի սրահում Հայաստանի պետական կամերային երգչախմբի կատարմամբ, որն անցել է մեծ հաջողութեամբ: Կոմիտասեան շաբաթն անցկացւում էր Ֆրանսիայի եւ Հայաստանի մշակոյթի նախարարութիւնների հովանու ներքոյ:

---