Աւտովթարի զոհ է դարձել «Արմէնպրես» գործակալութեան անգլերէն
լուրերի խմբագիր-թարգմանիչ 25-ամեայ Յովհաննէս Խաչատրեանը
09-10-2009 21:30:00 | Հայաստան | Հասարակութիւն
ԵՐԵՎԱՆ, 9 ՀՈԿՏԵՄԲԵՐԻ, ԱՐՄԷՆՊՐԵՍ: Հոկտեմբերի 8-ի լոյս 9-ի
գիշերը ժամը 02.21-ին Երեւանի Գայի պողոտայի (Նոր Նորք) թիւ 14/3
հասցեում գտնուող «Մերսեդես» խանութ-սրահին հարակից տարածքում տեղի
է ունեցել ավտոպատահար, որի հետեւանքով զոհուել է երկու մարդ,
որոնցից մէկը եղել է «Արմէնպրես» լրատուական գործակալութեան
անգլերէն լուրերի բաժնի խմբագիր-թարգմանիչ 25-ամեայ Յովհաննէս
Գագիկի Խաչատրեանը:
Ինչպէս տեղեկացնում է «Արմէնպրես» լրատուական գործակալութիւնը`
վկայակոչելով ՀՀ արտակարգ իրավիճակների նախարարութեան Հայաստանի
փրկարար ծառայութեան տեղեկատուութեան եւ հասարակայնութեան հետ
կապերի բաժինը, դեռեւս չպարզված հանգամանքներում իրար են բախուել 5
աւտոմեքենայ` «Պորշ Կայեն» մակնիշի 54 ՍՍ 555, «ՎԱԶ-2107» մակնիշի Տ
28 13, «ՎԱԶ-2107» մակնիշի Տ 28 15, «ՎԱԶ-2107» մակնիշի Տ 2820 եւ
«ՎԱԶ-2107» մակնիշի Տ 2795 պետհամարանիշների աւտոմեքենաները:
Ոստիկանութիւնից ստացուել է ահազանգ, որ կան տուժածներ, եւ նրանց
աւտոմեքենաներից դուրս բերելու համար անհրաժեշտ է փրկարարների
օգնութիւնը: Դէպքի վայր է մեկնել Երեւանից մէկ մարտական հաշուարկ
եւ հրշեջ փրկարարական ջոկատի հերթապահ խումբը: Փրկարարների ուժերով
«Մերի» տաքսի ծառայութեանը պատկանող «ՎԱԶ-2107» մակնիշի Տ 2795
պետհամարանիշի աւտոմեքենայից դուրս են բերուել վարորդ Վարդգէս
Պետրոսեանի եւ ուղեւորի` Յովհաննէս Գագիկի Խաչատրեանի դիակները:
Միւս աւտոմեքենաների ուղեւորները տարբեր աստիճանի մարմնական
վնասուածքներով տեղափոխուել են «Սուրբ Գրիգոր Լուսաւորիչ» բժշկական
կենտրոն: Բժիշկները տուժածների վիճակը գնահատում են բաւարար: