Հայաստանի կառավարութիւնը պետական երաշխիքներ է տրամադրել
կառուցապատող 6 ընկերութիւնների
04-09-2009 21:00:00 | Հայաստան | Տնտեսութիւն
ԵՐԵՎԱՆ, 4 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Հայաստանի
կառավարութիւնը ձեռնամուխ է եղել «Պետական երաշխիք կիսակառոյց
բազմաբնակարան շէնքի աւարտման համար» հակաճգնաժամային ծրագրի
իրականացմանը: Ինչպէս սեպտեմբերի 4-ի ասուլիսում նշեց ՀՀ վարչապետի
օգնական, տնտեսական զարգացմանը նպաստող ծրագրերի աջակցութեան
աշխատանքային խմբի ղեկավար Դավիթ Յարութիւնեյանը, ծրագրի նպատակն է
պետական բիւջէտային երաշխիքներ տրամադրել կառուցապատողներին:
«ՀՀ կառավարութիւնն այս ծրագրով որեւէ ֆիզիկական գումար չի
տրամադրում` առաւել եւս ստացուած վարկերի հաշուին: Մենք տրամադրում
ենք բիւջէտային երաշխիքներ կառուցապատողներին: Այսինքն, պետութեան
երաշխավորմամբ կառուցապատողին բանկերը տրամադրելու են վարկային
ռեսուրսներ»,- նշեց Դ.Յարութիւնեյանը: Նրա խօսքերով, դրա շնորհիւ
առաջին հերթին բանկերը կկարողանան նուազագոյն ռիսկերով օգտագործել
իրենց վարկային ռեսուրսները: Այդպիսով կառավարութիւնը նպաստում է,
որ ռիսկերը նուազեցուեն, եւ բանկերը կարողանան տրամադրել վարկային
ռեսուրսներ:
Նշուեց, որ կառավարութիւնն արդէն պետական երաշխիքներ է
տրամադրել 6 կառուցապատողների` «Էլիտ Գրուպ» ՓԲԸ-ին, «Հերմեկ»,
«Լեւոն Ամիրխանեան», «Մ.Գ.-Հաուզինգ» ՍՊԸ-ներին, «Վահէ
Յարութիւնեան» ԱՁ-ին եւ «ԱՎՈ Ֆ.Մ.Հ.» ՍՊԸ-ն-ին: Ընդհանուր առմամբ,
այս ընկերութիւններին տրամադրվել է 12 մլն ԱՄՆ դոլար, որով
կառուցուելու է մօտ 116 հազար քմ տարածքով բնակֆոնդ:
Դ.Յարութիւնեյանը յայտնեց, որ ներկայումս քննարկւում են մօտ 5 մլն
դոլարի արժողութեամբ եւս մի քանի ծրագրեր:
Ըստ Դ.Յարութիւնեանի, շինարարութեան ծաւալները
հանրապետութիւնում այս տարուայ մայիսից կայուն աճի միտում են
դրսեւորում: «Ապրիլի նկատմամբ մայիսին մենք ունենք մօտ 88%
շինարարութեան յավելաճ, յունիսին մայիսի նկատմամբ` մօտ 130%
յավելաճ, իսկ յուլիսին յունիսի նկատմամբ` 4,5% յավելաճ»,- նշեց
վարչապետի օգնականը: Նա միաժամանակ յայտնեց, որ Կադաստրի պետական
կոմիտէի տուեալներով յունիսին առք ու վաճառքի գործարքներն աւելացել
են մօտ 36,1%-ով: