Ռոստովյան թատրոնը բուլղարներին ցուցադրել է «Տիգրան Մեծը»
18-08-2009 16:30:00 | Ռուսաստան | Մշակոյթ
ԴՈՆԻ ՌՈՍՏՈՎ, 18 ՕԳՈՍՏՈՍԻ, ՆՈՅԵԱՆ ՏԱՊԱՆ - ՀԱՅԵՐՆ ԱՅՍՕՐ:
Անցած շաբաթ Դոնի Ռոստով քաղաքի Գորկու անուան դրամատիկական թատրոնը
վերադարձավ Բուլղարիայից: Ռոստովցիները Պլեւեն քույր քաղաքում
ցուցադրեցին երեք կատակերգութիւն: Ինչպէս հաղորդում է Ռուսաստանի
հայերի «Երկրամաս» թերթը, բուլղար բարեկամները ներկայացումներից
յետոյ ռոստովյան թատրոնին պարգեւեցին ուղեւորութիւն դէպի Վելիկո
Տըռնովո: «Պատմական այդ դեկորացիաներով մենք կարողացանք խաղալ
միանգամից երեք ներկայացում մեր խաղացանկից` «Ռոմեօ եւ Ջուլետ»,
«Թագուհին» եւ իհարկէ «Տիգրան Մեծը»,- նշեց Գորկու թատրոնի
գեղարուեստական ղեկավար Նիկոլայ Սորոկինը:
Թերթը նշում է, որ «Տիգրան Մեծ» ներկայացման պրեմիերան
Ռուսաստանի ժողովրդական արտիստ Նիկոլայ Սորոկինի բեմադրութեամբ
ռոստովյան թատրոնում կայացել է դեռեւս 2008 թուականի հոկտեմբերի
26-ին: Համարձակվելով բեմական լեզուի փոխադրել Արա Գեւորգեանի
«Տիգրան Մեծ» պատմական դրաման, ռոստովյան թատրոնը որոշել է
ժամանակակիցներին պատմել 2000-ամեայ վաղեմութեան ողբերգութիւն:
Պրեմիերայից յետոյ անցած ժամանակամիջոցում Գորկու անուան
դրամատիկական թատրոնը այդ ներկայացմամբ հմայել է իր
հանդիսականներին ոչ միայն Դոնի Ռոստովում, այլեւ Ռուսաստանի տարբեր
մարզերում հիւրախաղերի ընթացքում: