Երեւանում բացուեց հայազգի 15 լուսանկարիչների ցուցահանդէս եւ
ներկայացուեց Վ.Քոչարի «Հայ լուսանկարիչներ» պատկերագիրքը
20-04-2009 21:00:00 | Հայաստան | Մշակոյթ
ԵՐԵՎԱՆ, 20 ԱՊՐԻԼԻ, ՆՈՅԵԱՆ ՏԱՊԱՆ: Երեւանում, Հայաստանի
Գիտութիւնների ազգային ակադեմիայի պատկերասրահում ՀՀ սփիւռքի
նախարարութեան հովանաւորութեամբ ապրիլի 20-ին բացուեց հայազգի 15
ճանաչուած լուսանկարիչների ցուցահանդէս, որի ընթացքում ներկայացուեց
նաեւ յայտնի լուսանկարիչ Վահան Քոչարի «Հայ լուսանկարիչներ»
պատկերագիրքը: Ինչպէս ցուցահանդէսի բացման խօսքում նշեց ՀՀ
սփիւռքի նախարար Հրանուշ Յակոբեանը, Վահան Քոչարի կազմած
պատկերագիրքը հանրագիտարանային եւ տեղեկատուական մեծ նշանակութիւն
ունի: Ըստ նախարարի, այդ գրքով Վ.Քոչարը հիմք է դրել նաեւ հայ
լուսանկարիչների միջեւ կապի ստեղծմանը: Նախարարը նաեւ շնորհաւորեց
արուեստագէտին իր 60-ամեակի կապակցութեամբ:
Շնորհակալութիւն յայտնելով նման ցուցահանդէս նախաձեռնելու
համար, Վահան Քոչարը նշեց, որ այդպիսով իր հոր` անուանի
լուսանկարիչ Անդրանիկ Քոչարի, երազանքը իրականութիւն դարձաւ:
Այսպիսով, Ա.Քոչարն աւարտեց իր հոր սկսած գործը` տպագրելով
աշխարհասփիւռ հայ լուսանկարիչներին նուիրուած պատկերագիրքը: Այժմ
նախապատրաստւում է գրքի լրացուած անգլերէն երկհատոր տարբերակը:
Ինչպէս նշուած է ՀՀ Սփիւռքի նախարարութեան տարածած մամլոյ
հաղորդագրութեան մէջ, «Հայ լուսանկարիչներ» բառարանային
պատկերագիրքը լոյս է տեսել 2007թ. վերջին 488 էջով եւ 1000
տպաքանակով Հայաստանի նախկին վարչապետ Անդրանիկ Մարգարեանի
հովանաւորութեամբ: Գիրքն ամբողջական հանրագիտարան է սփիւռքի եւ
հայրենիքի լուսանկարչական ժառանգութեան, որ մինչ օրս յաւուր
պատշաճի չի ներկայացուել հայ հանրութեանը: Գրքում նշուած է մօտ 480
հայ լուսանկարչի անուն: Նրանցից 300-ը ներկայացուած են իրենց
կենսագրականներով եւ լուսանկարներով, իսկ 180-ի անունները
յայտնաբերուել եւ զետեղվել են տարբեր լուսանկարչական կնիքների եւ
ծրարների վրայ: Գրքում զետեղուած են համաշխարահային հռչակ ստացած
այնպիսի լուսանկարիչների անուններ, ինչպիսիք են կանադահայեր
Յուսուֆ Քարշը, Արթո Գավուքը, պոլսահայ Արա Գյուլերը, ամերիկահայ
Հարրի Քունդակչյանը եւ շատ ուրիշներ: Այս աշխատանքով Վահան Քոչարը
փաստորեն առաջին փորձն է արել ամբողջացնելու հայ լուսանկարչական
արուեստի պատմութիւնը:
Վահան Քոչարը ծնուել է 1949 յունվարի 25 Երեւանում: Նրա հայրը`
յայտնի լուսանկարիչ Անդրանիկ Քոչարը եգիպտահայ է, ով 1947 թուականին
հայրենադարձել է Հայաստան: Վահան Քոչարը աւարտել է Կոջոեանի անուան
նկարչական դպրոցը եւ Աբովեանի անուան մանկավարժական ինստիտուտը:
ԽՍՀՄ ժուռնալիստների միութեան անդամ է: «Թանգարան» գրքի համար 1998
Ֆրանկֆուրտի միջազգային ցուցահանդէսում արժանացել է ԵՈՒՆԵՍԿՕ-ի
մրցանակին: Ռազմիկ Դաւոեանի «Ոգեղէն հաց» գրքի համար 2002 թ.
արժանացել է հայ գրահրատարակիչների մրցանակին: Վերջին
տասնամեակների ընթացքում Հայաստանում հրատարակուած բազմաթիւ հայ
նկարիչների պատկերագրքերի գեղարուեստական խմբագիրն է ու նկարիչը: