ԵՐԵՎԱՆ, 23 ՄԱՐՏԻ, ՆՈՅԵԱՆ ՏԱՊԱՆ: Ֆրանկոֆոնիայի օրերի
շրջանակներում մարտի 22-ին Երեւանի Կ.Դեմիրճեանի անուան
մարզամշակութային համալիրում կայացաւ կանադացի հանրայայտ երգիչ
Գարուի մենահամերգը: Ինչպէս համերգից առաջ կազմակերպուած ասուլիսում
յայտնեց երգիչը, իր համար մեծ պատիւ է ֆրանսիական երգը ներկայացնել
ոչ ֆրանկոֆոն երկրում:
Գարուի խօսքերով, Հայաստանում անցկացրած երկու օրերի
ընթացքում երգիչն այցելել է Հայաստանի Պատմութեան թանգարան, Խոր
վիրապ: Ըստ նրա, այսուհետ իր կեանքի անմոռանալի յուշերից մէկը
կլինի այցը Արարատի փեշին գտնուող այդ վանական համալիրը:
Գարուն երգի խոսքերից առաւել կարեւորում է երաժշտութիւնը,
որը ազգային պատկանելութիւն չունի եւ հասկանալի է բոլորին: Իսկ
ինչ վերաբերում է «Belle» երգին, որ ժամանակին մեծ ճանաչում բերեց
Գարուին, ապա երգիչը խոստովանեց, որ այդ երգը տակնուվրայ է արել իր
կեանքը, ներաշխարհը, թէեւ այդ երգից հիմա մի քիչ յոգնել է:
Պատասխանելով այն հարցին, թէ ո՞րն է իր կեանքի կարեւոր
ձեռքբերումը, Գարուն նշեց, որ դա իր 7-ամեայ դուստր Էմիլին է: Իսկ
ինչ վերաբերում է երգչի արմատներով հայ լինելուն, ապա Գարուն
հերքեց այդ լուրերը` յաւելելով, որ «այս երկու օրերի ընթացքում դեռ
չեմ յայտնաբերել, որ արմատներս հայկական են»:
Նշենք, որ համերգը կազմակերպել էր BlackBan ընկերութիւնը:
Կազմակերպիչները համերգը լուսաբանող եւ ասուլիսին ներկայ գտնուող
լրագրողներին պարտադրել էին նախապէս ուղարկել հարցերը, որոնցից
ընտրություն պիտի կատարեր ընկերութեան մամուլի խօսնակը:
Արդիւնքում, ասուլիսում նոյնիսկ այդպիսի գրաքննութիւն անցած ոչ
բոլոր հարցերը լրագրողները կարողացան հնչեցնել: Երգչին ուղղուեց
ընդամէնը մօտ 10 հարց: Լրագրողներին այնուամենայնիւ յաջողուեց
պարզել` արդեօ՞ք այդ պայմանները թելադրված էին երգչի կողմից: «Ոչ,
ես կողմ եմ, որ հարցերը պլանաւորուած չլինեն, այլ լինեն ինքնաբուխ
եւ անկեղծ: Այդ դէպքում զրույցն աւելի հետաքրքիր է դառնում»,- ասաց
Գարուն: