Հայաստանի նախագահ Սերժ Սարգսեանն այցելեց «Լիկվոր»
դեղագործական ընկերութիւն
07-03-2009 21:15:00 | Հայաստան | Տնտեսութիւն
ԵՐԵՎԱՆ, 7 ՄԱՐՏԻ, ՆՈՅԵԱՆ ՏԱՊԱՆ: ՀՀ նախագահ Սերժ Սարգսեանը
մարտի 7-ին այցելեց «Լիկվոր» ՓԲ ընկերութիւն: Ինչպէս նշեց
ձեռնարկութեան գլխաւոր տնօրէն Սերգեյ Մաթեւոսեանը, ՀՀ նախագահի
այցը կապուած է մարտի 8-ի հետ, քանի որ «Լիկվոր»-ի աշխատողների մեծ
մասը կանայք են: Այցի միւս նպատակն ընկերութեան գործունէութեանը
ծանօթանալն է:
Ս.Մաթեւոսեանի խօսքերով, «Լիկվոր»-ն աշխատում է 1991թ.-ից,
հիմնական արտադրանքը ներերակային կաթիլային եւ ներարկման
լուծույթներն են, ակնաբուժական դեղամիջոցները (26 դեղագործական
խմբերի 60 անուանում դեղամիջոցներ), որոնք, Հայաստանում իրացուելուց
զատ, արտահանւում են ԱՊՀ-ի գրեթէ բոլոր երկրներ: Արտահանւում է
արտադրանքի մօտ 40%-ը: Ընկերութիւնը ներկայումս ունի 83 հիմնական
աշխատողներ, իսկ նրանց ընդհաբուր թիւը 107 է:
Նշուեց, որ «Լիկվոր»-ն զգում է միջազգային տնտեսական ճգնաժամի
ազդեցութիւնը, ինչը կապուած է արտաքին շուկաների հետ, սակայն
ներքին շուկայում իրացման ծաւալները չեն նուազել:
Ըստ Ս.Մաթեւոսեանի, ընկերութիւնը ՀՀ կառավարութեան
հակաճգնաժամային օպերատիւ շտաբին է ներկայացրել է բիզնես-ծրագիր`
աջակցութիւն ստանալու ակնկալիքով, եւ բիզնես-ծրագիրը քննարկման
փուլում է: ՀՀ էկոնոմիկայի նախարար Ներսէս Երիցյանի խօսքերով,
«Լիկվոր»-ը տարեկան արտահանում է 1 մլն ԱՄՆ դոլարի արտադրանք, ինչը
դեղագործութեան ոլորտի ընկերութիւնների համար բաւականին մեծ
ցուցանիշ է: Ընկերութեան ներկայացրած բիզնես-ծրագիրը վերաբերում է
նոր գործարանի կառուցմանը, ինչի շնորհիւ, նախ, կստեղծուեն
շինարարութեան ոլորտի նոր աշխատետեղեր, յետոյ` կհիմնվի
բարձրտեխնոլոգիական գիտատար արտադրութիւն: Դա կընձեռի «Լիկվոր»-ի
արտահանման ծավալներներն էապէս ընդլայնելու հնարաւորութիւն:
Նշուեց, որ «Լիկվոր»-ի բիզնես-ծրագիրը ներառում է 10 տարուայ
ժամանակահատված եւ ծրագրի իրականացումով ընկերութեան արժէքը
կմեծանա մի քանի անգամ: Բացի այդ, նախատեսւում է «Լիկվոր»-ում
ներդնել GMP ստանդարտներ եւ ընդլայնել արտադրանքի տեսականին`
սեփական գիտական մշակումների հիման վրայ: Նախարարի տուեալներով,
վերջին տարիներին ընկերութեան եկամուտները տարեկան աճում են
30-50%-ով, եւ «Լիկվոր»-ն ի վիճակի է սեփական միջոցներով նոր
գործարան կառուցել, բայց պետութեան աջակցութիւնը թոյլ կտայ
կրճատել շինարարութեան ժամկէտները: Ըստ նրա, «Լիկվոր»-ի ծրագրերի
յաջողութեան երաշխիքներից է Վերակառուցման եւ զարգացման բանկի 40%
մասնակցութիւնը ընկերութեան կապիտալում (2005թ.-ի օգոստոսից):
«Լիկվոր»-ը կառավարութեանը ներկայացրել է 2,4 մլն ԱՄՆ դոլարի
վարկային աջակցութեան ստանալու բիզնես-ծրագիր: Այդ գումարից 1,8
մլն դոլարը նախատեսւում է ծախսել նոր գործարանի կառուցման համար,
որի շինարարութիւնն սկսուել է Երեւանի Նոր Նորքի համայնքի Ջրվէժ
թաղամասում: Նախատեսւող ներդրումների ծաւալը կազմում է 3 մլն 480
հազար դոլար: