«Սինոփսիս»-ը շարունակելու է ներդրումները Հայաստանի
մասնաճիւղում
26-02-2009 20:30:00 | Հայաստան | Տնտեսութիւն
ԵՐԵՎԱՆ, 26 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Կիսահաղորդիչների
նախագծման եւ արտադրութեան համար ծրագրային միջոցների եւ մտաւոր
սեփականութեան մշակման ոլորտի համաշխարհային առաջատար «Սինոփսիս»
ընկերութիւնը, որի խոշորագոյն մասնաճյուղերից մէկը` «Սինոփսիս
Արմէնիա»-ն, գտնւում է Հայաստանում, յայտարարել է, որ 2009թ.-ի
ֆինանսական տարուայ առաջին եռամսյակում (ԱՄՆ-ում ֆինանսական տարին
սկսւում է նոյեմբերի 1-ին եւ աւարտւում հոկտեմբերի 31-ին) ունեցել
է 339,8 մլն ԱՄՆ դոլարի եկամուտ, ինչը 7,7%-ով աւելին է 2007թ.-ի
ֆինանսական տարուայ առաջին եռամսյակի 315,5 մլն դոլարի համեմատ:
Այս մասին փետրուարի 26-ին յայտնեց «Սինոփսիս»-ի մարքեթինգի
գծով փոխնախագահ եւ «Սինոփսիս Արմէնիա»-ի գլխաւոր գործադիր տնօրէն
Ռիչ Գոլդմանը` մինչ Հայաստանի պետական ճարտարագիտական
համալսարանում դասախոսութեամբ հանդէս գալը:
Ընդ որում, ԱՄՆ-ի Համընդհանուր ընդունուած հաշուապահական
հաշուառման սկզբունքներին (US GAAP) համաձայն հաշուարկուած
«Սինոփսիսի» 2009թ.-ի ֆինանսական տարուայ առաջին եռամսյակի մաքուր
եկամուտը կազմել է 52,4 մլն դոլար` 2008թ.-ի ֆինանսական տարուայ
առաջին եռամսյակի 46,4 մլն դոլարի դիմաց:
Ռ.Գոլդմանը յաւելեց, որ «Սինոփսիս»-ում նախատեսել են 2009թ.-ի
ֆինանսական տարուայ արդիւնքներով ունենալ 1,4 մլրդ դոլարի եկամուտ,
այն դէպքում, երբ 2008թ.-ի ֆինանսական տարուայ եկամուտը կազմել է 1
մլրդ 337 մլրդ դոլարի դիմաց, ինչն իր հերթին 10,3%-ով աւելին էր
2007թ.-ի ֆինտարվա 1 մլրդ 212 մլն դոլար եկամտից:
Նրա խօսքերով, ներկայիս միջազգային ֆինանսատնտեսական ճգնաժամի
պայմաններում «Սինոփսիս»-ը կառաւարւում է «շատ կոնսերվատիվ,
դասական մոտեցումներով». ինչով էլ պայմանաւորւում են ընկերութեան
յաջողութիւնները: Միաժամանակ, «Սինոփսիս»-ը շարունակում է
ներդրումները գիտահետազօտական եւ ճարտարագիտական ոլորտներում: Դա
կնպաստի այն բանին, որ ճգնաժամի աւարտին ընկերութիւնը կլինի աւելի
ուժեղ եւ կայուն:
Նշուեց, որ «Սինոփսիս»-ի հայկական մասնաճյուղերից ամենաուժեղ
եւ մեծ ստորաբաժանումներից մէկն է ընկերութեան աշխարհի տարբեր
երկրներում գործող շուրջ 60 գրասենեակների շարքում, եւ այդտեղ
գիտահետազօտական աշխատանքների հզորութիւնների մեծացման
ուղղութեամբ ներդրումները նունպես շարունակուելու են: «Սինոփսիս
Արմէնիա»-ում աշխատում են շուրջ 400 ճարտարագէտներ: Ռ.Գոլդմանը
մասնաճիւղի գործունէութեան հետ կապուած ռիսկեր համարեց
տարածաշրջանի անկայուն վիճակը, Հայաստանում ինտերներտ կապի
անբաւարար որակը եւ անկայունութիւնը, հարկային եւ մաքսային
օրէնսդրութեան անկատարութիւնը, բուհական կրթութեան ոչ բաւարար
որակը: «Սինոփսիս»-ի պաշտօնեայի գնահատմամբ, Հայաստանի
կառավարութիւնը խելամիտ է վարւում, երբ ներկայիս միջազգային
ֆինանսատնտեսական ճգնաժամի պայմաններում ներդրումներ է կատարում
տեղեկատուական տեխնոլոգիաների ոլորտում, մասնաւորապէս, ինտերնետի,
բարձրագոյն կրթութեան որակի բարելաւման ուղղութիւններով: