ՎԱԽՃԱՆՈՒԵԼ Է ՀԱՅ ՀՈԳԵՒՈՐ ԵՐԳԻ ԱՆԶՈՒԳԱԿԱՆ ՄՇԱԿ ԽՈՐԷՆ ՊԱԼԵԱՆԸ
23-01-2007 15:54:00 | Հայաստան | Մշակոյթ
ԵՐԵՎԱՆ, 23 ՅՈՒՆՎԱՐԻ, ՆՈՅԵԱՆ ՏԱՊԱՆ: «Հայ մշակոյթը կրեց եւս
մի ծանր կորուստ` կեանքից հեռացաւ հայ հոգեւոր երգարվեստի
անզուգական մշակ, շարականների հմուտ գիտակ Խորէն Պալեանը: Մեծ է
նրա վաստակը: Նա ոչ միայն հայ ազգային եւ հոգեւոր երգի բարձրարուեստ
կատարող էր, այլեւ դրա անխոնջ մունետիկը աշխարհում, այդ արուեստով
սերունդները դաստիարակելու ջատագովը եւ գործունեայ անձ»: Այս մասին
ասուած է Մտաւորականների ֆորումի «ՆՈՅԵԱՆ ՏԱՊԱՆ»-ին տրամադրած
հաղորդագրութիւնում:
Սերուած Պալյանների հռչակաւոր ընտանիքից` նա ժառանգել էր եւ
մարդկային բարձր նկարագիր, եւ տաղանդ, եւ ազգին ծառայելու
անկոտրում կամք: Ըստ հաղորդագրութեան, «նրա համար խորթ էին այն
սեւն ու ստորը, այն ամենաթողութիւնը, որ վերջին տասնհինգ
տարիներին պատուհասում են հայ ժողովրդին»: Նշւում է, որ Խ.Պալեանը
երբեք չդավաճանեց ինքն իրեն. նա ապրեց օրինակելի կեանք եւ
հավերժացրեց իր անունը հարազատ ժողովրդի անմահների մատեանում:
Երեւանի պետական համալսարանի Հայոց լեզուի պատմութեան ամբիոնի
դոցենտ, անուանի շարականագետ, գրաբարի երկարամեայ դասախօս, խմբավար
եւ երգիչ Խ.Պալեանը աւարտել է Ս.Էջմիածնի հոգեւոր ճեմարանը:
1955թ.-ին Մայր տաճարում ձեռնադրուել է սարկաւագ, իսկ 1961թ.-ին
երջանկահիշատակ Վազգէն Ա Ամենայն Հայոց կաթողիկոսի ձեռամբ
ձեռնադրուել է կուսակրոն քահանա: 1962թ.-ին Օշականում պաշտպանել է
վարդապետական ավարտաճառ եւ ստացել վարդապետական չորս աստիճաններ:
Սբ. Էջմիածնում զբաղեցրել է պատասխանատու պաշտօններ: 1965թ.-ի
ապրիլին Եղեռնի 50-ամեակին Հայաստանում ծայր առած ազգային
ինքնագիտակցութեան աննախընթաց պոռթկումը հիմնական շարժառիթը
հանդիսացաւ, որպէսզի նա թողնի հոգեւոր ասպարէզը` երբեք չբաժանվելով
սակայն եկեղեցուց:
1965թ.-ին նա ընդունուել եւ 3 տարի անց գերազանցութեամբ
աւարտել է ԵՊՀ-ի բանասիրութեան ֆակուլտետը, ապա 1968թ.-ին
նշանակուել է դասախօս Հայոց լեզուի պատմութեան ամբիոնում`
դասավանդելով լեզուի պատմութիւն եւ գրաբար: 1978-2004թթ.-ին
դասաւանդել է Սբ. Էջմիածնի Գեւորգեան հոգեւոր ճեմարանում, ապա
Սեւանի Վազգէնեան դպրանոցում` ժամակարգություն, տեսական
շարականագիտություն եւ հայ հոգեւոր երաժշտություն առարկաները: Նրա
ծառայութիւնները բարձր գնահատելով, Վեհափառ Հայրապետ Գարեգին Բ
կաթողիկոսը Խորէն Պալեանին շնորհել է «Ս.Ներսէս Շնորհալի»
շքանշանը:
Խ.Պալեանն ամուսնացած էր հոգեւոր երգերի անզուգական եւ
հռչակաւոր կատարող Լուսինէ Զաքարյանի հետ:
Խ.Պալեանի հուղարկավորությունը տեղի կունենայ յունվարի 25-ին`
Էջմիածնի Սբ.Գայեանէ վանքի գերեզմանատանը: