ՀՀ ՆԱԽԱԳԱՀՆ ԱՌԱՋԱՐԿԵԼ Է ՄԱՅՐԱՔԱՂԱՔԻ ՏԱՐԲԵՐ ՀԱՏՈՒԱԾՆԵՐՈՒՄ
ԿԱՌՈՒՑԵԼ ՓՈՔՐԱԾԱՎԱԼ ԱՌԵՎՏՐԻ ԿԵՆՏՐՈՆՆԵՐ
22-01-2007 17:28:00 | Հայաստան | Հասարակութիւն
ԵՐԵՎԱՆ, 22 ՅՈՒՆՎԱՐԻ, ՆՈՅԵԱՆ ՏԱՊԱՆ: Թէեւ Երեւանի
քաղաքապետարանը մի քանի տարի է բոլոր միջոցները ձեռնարկում է
փողոցային առեւտրի կանոնակարգման ուղղութեամբ, այդուհանդերձ այդ
աշխատանքները դեռեւս թերի են: Ինչպէս յունվարի 22-ի ասուլիսում
յայտնեց քաղաքապետարանի Առեւտրի եւ սպասարկման վարչութեան պետ
Կարեն Գեւորգեանը, քաղաքացիները դեռ չեն գիտակցում, որ փողոցում
վաճառւող մթերքը վտանգաւոր է առողջութեան համար, եւ այն իրացւում է
սանիտարահիգիենիկ նորմերին չհամապատասխանող պայմաններում:
Ըստ նրա, ՀՀ նախագահի կարգադրութեամբ յանձնարարուել է լուրջ
ուշադրութիւն դարձնել Երեւանի փողոցներում տաղավարների
տեղակայմանը եւ արտաքին տեսքին: Ռ.Քոչարեանը նաեւ առաջարկել է
մայրաքաղաքի տարբեր հատուածներում կառուցել փոքրածավալ առեւտրի
կենտրոններ:
Կ.Գեւորգեանը յայտնեց, որ քաղաքապետարանը բնակչութիւնից
բազմաթիւ բողոքներ է ստանում` բնակելի շէնքերի նկուղներում գործող
հացաթխման արտադրամասերի, քիմմաքրման կէտերի, բաղնիք-սաունաների եւ
այլ օբյեկտների վերաբերեալ: Նշուեց, որ բնակիչների բողոքները
հիմնականում արդարացի են, քանի որ շէնքերի նկուղներում նման
օբյեկտների գործունէութիւնը օրէնքով չի թոյլատրւում: Այդ
նպատակով, 2007թ.-ի յունվարի 1-ից Երեւանի քաղաքապետարանը գրաւոր
զգուշացումներ է ուղարկում նմանատիպ օբյեկտների սեփականատէրերին,
որպէսզի նրանք վերանայեն իրենց գործունէութեան տեսակը եւ այն փոխեն
մէկ այլ գործունէութեան: Եթէ 2 ամսուայ ընթացքում այդ ուղղութեամբ
սեփականատէրերը աշխատանքներ չտանեն, ապա քաղաքապետարանը կդիմի
դատարան:
Վարչութեան պետը անդրադարձաւ նաեւ հասարակական զուգարանների
խնդրին: Ըստ Կ.Գեւորգեանի, անցած տարի քաղաքապետի որոշմամբ դրանց
կառուցման նպատակով կատարուել է 7 հողահատկացում, իսկ այս տարի` 50
հողահատկացում: