ԵՄ-Ի ԿՈՂՄԻՑ 2009 Թ.-ԻՆ ՀՀ-ԻՆ ՏՐԱՄԱԴՐՈՒԵԼԻՔ 15 ՄԼՆ ԵՎՐՈՆ
ՆԵՐԱՌՈՒԱԾ Է ՊԵՏԲԻՒՋԷՈՒՄ ՈՐՊԷՍ ԱՋԱԿՑՈՒԹԻՒՆ
30-10-2008 20:24:00 | Հայաստան | Տնտեսութիւն
ԵՐԵՎԱՆ, 30 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Եւրոմիութեան Նոր
հարեւանութեան ծրագրի շրջանակներում 2009թ.-ին Հայաստանին
տրամադրուելիք Եւրոպական համագործակցութեան քաղաքականութեան
դրամաշնորհի 3 չափաբաժինները` ընդհանուր առմամբ 15 մլն եւրոյի կամ
6,6 մլրդ դրամի չափով, ներառուած են գալիք տարուայ պետական բիւջէի
նախագծում: Այս մասին ՀՀ Ազգային Ժողովի մշտական յանձնաժողովների
հոկտեմբերի 30-ի համատեղ նիստում յայտնեց ՀՀ ֆինանսների նախարարի
առաջին տեղակալ Պաւել Սաֆարեանը:
Ըստ նրա, ամբողջ գումարը` որպէս աջակցութիւն ՀՀ պետբյուջեին,
ներառուած է վերջինիս եկամտային մասում: Նշուեց նաեւ, որ թէեւ
Հայաստանը պարտաւորուած է եւ իրակացնում է Հայաստան-ԵՄ
գործողութիւնների 2007-2011թթ.-ի ծրագրով նախատեսուած
միջոցառումները, սակայն ՀՀ կառավարութիւնն ինքնուրոյն է որոշում
այդ միջոցառումների իրականացման ֆինանսական կողմը. ծախսերի
քանակական պահանջ ԵՄ-ի կողմից դրուած չէ: Մասնաւորապէս, միջնակարգ
կրթութեան բարեփոխումների մասով կառավարութիւնը 2009թ.-ին
ծրագրավորել է 225 մլն դրամ, թարգմանչական ծառայութիւնների համար`
102 մլն դրամ, Եւրոպայի Խորհրդի կողմից հրապարակուած գիտամեթոդական
գրականութեան թարգմանության եւ տպագրության համար` 3 մլն դրամ: