ՍԱՐԿՈԶԻՆ ՄԻՋՈՒԿԱՅԻՆ ԳՈՐԾԱՐՔՆԵՐ Է ԿՆՔՈՒՄ ԱՐԱԲԱԿԱՆ ԵՐԿՐՆԵՐԻ
ՀԵՏ
15-01-2008 18:00:00 | | Միջազգային
ՓԱՐԻԶ, 15 ՅՈՒՆՎԱՐԻ, ՆՈՅԵԱՆ ՏԱՊԱՆ: Ֆրանսիայի նախագահ Նիկոլա
Սարկոզին մտադիր է Արաբական Միաւորուած Էմիրություններին առաջարկել
համագործակցութիւն խաղաղ միջուկային արդիւնաբերութեան զարգացման
ուղղութեամբ, հաղորդում է Reuters-ը:
Այս առաջարկը կլինի երկրորդը համագործակցութեան այն առաջարկից
յետոյ, որ ֆրանսիացի առաջնորդն արել էր Սաուդյան Արաբիային կիրակի
օրը: Դրանից բացի, ֆրանսիական EDF ընկերութիւնը նախօրէին յուշագիր
է ստորագրել Քաթարի հետ միջուկային ոլորտի բանակցութիւնները
շարունակելու վերաբերեալ:
Նիկոլա Սարկոզին, որ մի շարք համաձայնագրեր է կնքել Ալժիրի եւ
Լիբիայի հետ, չի թաքցնում, որ արաբական երկրներին հիմնական
գործընկեր է համարում միջուկային ճիւղի խաղաղ զարգացման գործում: