ԼԵՒՈՆ ԱՐՈՆԵԱՆԸ ՎԵՅԿ ԱՆ ԶԵԵԻ ՄՐՑԱՇԱՐԻ ԱՌԱՋԻՆ 2 ՓՈՒԼԵՐՈՒՄ
ՅԱՂԹԱՆԱԿՆԵՐ Է ՏԱՐԵԼ
14-01-2008 17:00:00 | | Սպորտ
ՎԵՅԿ ԱՆ ԶԵԵ, 14 ՅՈՒՆՎԱՐԻ, ՆՈՅԵԱՆ ՏԱՊԱՆ: Յունվարի 12-ին
Հոլանդիայի Վեյկ ան Զեե քաղաքում 70-րդ անգամ մեկնարկել է «Կորուս»
անուանումով շախմատի միջազգային փառատոնը: 20-րդ կարգի մրցաշարում
հանդէս են գալիս աշխարհի գրեթէ բոլոր ուժեղագոյն շախմատիստները:
Գլխաւոր մրցաշարի մասնակից 14 գրոսմայստերների թւում է
փառատոնի անցեալ տարուայ յաղթող Լեւոն Արոնեանը: Խաղացուած առաջին 2
փուլերում նա յաղթանակներ է տարել նախ Վեսելին Թոփալովի
(Բուլղարիա), ապա Բորիս Գելֆանդի (Իսրայել) նկատմամբ: Լ.Արոնեանը
եւ Մագնուս Կառլսենը (Նորվեգիա) 2 հնարաւորից վաստակել են 2-ական
միաւոր եւ գլխաւորում են մրցաշարային աղիւսակը:
Գլխաւոր մրցաշարին զուգահեռ անցկացուող «Բ» մրցաշարում Գաբրիէլ
Սարգսեանը եւ Սերգեյ Մովսիսեանը (Սլովակիա) իրենց 2 պարտիաներն էլ
աւարտել են ոչ-ոքի արդիւնքով եւ 1-ական միաւորով բաժանում են
7-10-րդ տեղը: