ԿՈԼՈՒՄԲԻԱՅԻ ԽՈՐՀՐԴԱՐԱՆԸ ԳՈԼՈԴՈՄՈՐԸ ՃԱՆԱՉԵԼ Է ՈՒԿՐԱԻՆԱԿԱՆ
ԺՈՂՈՎՐԴԻ ՑԵՂԱՍՊԱՆՈՒԹԵԱՆ ԱԿՏ
24-12-2007 19:50:00 | | Միջազգային
ԼԻՄԱ, 24 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: Պերուում եւ
համատեղությամբ Կոլումբիայում Ուկրաինայի դեսպանութիւնը ստացել է
Ուկրաինայում Գոլոդոմորը ուկրաինական ժողովրդի ցեղասպանութեան ակտ
ճանաչելու մասին Կոլումբիայի Հանրապետութեան Կոնգրեսի
Ներկայացուցիչների պալատի բանաձեւի ստորագրուած եւ համապատասխան
ձեւով գրանցուած պատճէնը, հաղորդում են ուկրաինական ԶԼՄ-ները:
Ուկրաինայի ԱԳՆ տուեալներով, Կոլումբիայի խորհրդարանի ստորին
պալատը դատապարտել է ցեղասպանութիւնը, որի զոհ են դարձել 7 միլիոն
ուկրաինացիներ, ինչպէս նաեւ ամբողջատիրութեան դրսեւորումները եւ
մարդկութեան դէմ ուղղուած բոլոր տեսակի ցանկացած
յանցագործութիւնները:
Բանաձեւում նշւում է, որ 1932-1933թթ. Գոլոդոմորը
Ուկրաինայում ահաբեկութեան քաղաքականութեան հետեւանք էր, որ վարում
էր ամբողջատիրական պետութիւնը ժողովրդի ոչնչացման նպատակով:
Այսպիսով, Կոլումբիան դարձաւ Լատինական Ամերիկայի չորրորդ
երկիրը Պերուից, Պարագվայից եւ Էկվադորից յետոյ, որի խորհրդարանը
1932-1933թթ. Գոլոդոմորը Ուկրաինայում ճանաչել է ուկրաինական
ժողովրդի ցեղասպանութեան ակտ, նշել են Ուկրաինայի ԱԳՆ-ում: