Սերժ Սարգսեան. Կարպիս Սուրէնեանին ենք մենք պարտական համաշխարհային գրականութեան հսկաների կոթողային երկերը հայերէն ընթերցելու բերկրանքի համար
06-10-2011 21:00:06 | Հայաստան | Մշակոյթ
Նախագահ Սերժ Սարգսեանն այսօր ցաւակցական հեռագիր է յղել նշանաւոր գրող եւ թարգմանիչ Կարպիս Սուրէնեանի մահուան կապակցութեամբ:
Ինչպէս յայտնում է ՀՀ նախագահի Մամլոյ գրասենեակը, Կարպիս Սուրէնեանի ընտանիքի անդամներին, հարազատներին, գործընկերներին, ինչպէս նաեւ նրա աշխատանքների երախտապարտ ընթերցողներին ուղղուած Հանրապետութեան ղեկավարի ցաւակցական հեռագրում ասուած է.
«Նրան ենք մենք պարտական համաշխարհային գրականութեան հսկաների` Դօստոեւսկու եւ Գոլսուորդիի կոթողային երկերը հայերէն ընթերցելու բերկրանքի համար: Ճանաչուած մտաւորականի մահը, ում թարգմանութիւնները հարստացրել էն հայ թարգմանական գրականութիւնը, ծանր կորուստ է մեզ համար»: