ՀԱՅԱՍՏԱՆԻ ՖՈՒՏԲՈԼԻՍՏՆԵՐԸ ԵՎՐՈ-2000 ԸՆՏՐԱԿԱՆ ՄՐՑԱՇԱՐԻ ՎԵՐՋԻՆ
ՀԱՆԴԻՊՄԱՆԸ ՀԱՂԹԱՆԱԿ ՏԱՐԱՆ
11-10-1999 19:00:00 | Հայաստան | Սպորտ
ԵՐԵՎԱՆ, 11 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Բարսելոնում տեղի
ունեցած Անդորրա-Հայաստան հավաքականների խաղն ընթացավ Հայաստանի
ֆուտբոլիստների անվերապահ գերազանցությամբ. նրանք 3:0 խոշոր
հաշվով հաղթանակ տարան, ինչը միայն բարոյահոգեբանական
նշանակություն ուներ, քանի որ ոչ բարելավում եւ ոչ էլ վատթարացնում
էր հավաքականի մրցաշարային վիճակը: Մինչ Եվրո-2000 ֆուտբոլի
ընտրական մրցաշարի իրենց վերջին հանդիպմանը մեկնելը ՀՀ ազգային
հավաքականի մարզիչները չէին թաքցնում հաղթանակի ձգտելու
տրամադրությունը եւ այն իրականացվեց: Չնայած խաղի հիմնական մասը
հայ ֆուտբոլիստներն անցկացրին տաս հոգով (31-րդ րոպեին դաշտից
հեռացվել էր Ալբերտ Սարգսյանը), Արթուր Պտերոսյանը, Տիգրան Եսայանը
եւ Արմեն Շահգելդյանը մեկական գնդակ խփեցին մրցակցի դարպասը եւ
ապահովեցին հավաքականի խոշորագույն նվաճումը մրցաշարում: Հայաստանի
ֆուտբոլիստները տանելով իրենց երկրորդ եվ վերջին հաղթանակը այս
մրցաշարում (առաջինը` նույն Անդորրայի նկատմամբ 3:1 հաշվով`
Երեւանում)` 8 միավորով գրավեցին նախավերջին` 5-րդ տեղը:
Իսկ բաղձալի 1-ին տեղը ենթախմբում, որը ուղիղ ճանապարհ է
բացում դեպի Եվրոպայի առաջնություն, նվաճեցին աշխարհի չեմպիոն
Ֆրանսիայի ֆուտբոլիստները, որոնք Փարիզում 3:2 հաշվով դրամատիկ
մրցապայքարում հաղթեցին իսլանդացիներին: Մոսկվայում գերլարված
մթնոլորտում Ուկրաինայի ֆուտբոլիստները, 1:1 խաղալով Ռուսաստանի
թիմի հետ, վերջինիս դարպասապահի անհավատալի սխալի շնորհիվ,
գրավեցին 2-րդ տեղը, որը կարծես թե արդեն ապահովել էր Ռուսաստանի
թիմը, երբ 75-րդ րոպեին Կարպինը բացեց խաղի հաշիվը: Շեւչենկոն
խաղավարտից 2 րոպե առաջ խփեց իր միակ գոլը այս մրցաշարում, բայց
այն ոսկու գին ունեցավ, ուկրաինացիները շարունակում են մրցապայքարը
Եվրոպայի առաջնության մրցաշարում:
4-րդ ընտրական ենթախումբ
Խաղ Միավոր Գոլեր
1.Ֆրանսիա 10 21 17-10
2. Ուկրաինա 10 20 14-4
3. Ռուսաստան 10 19 22-12
4. Իսլանդիա 10 15 12-7
5. Հայաստան 10 8 8-15
6. Անդորրա 10 0 3-27