ԱՌՈՂՋ ՄԱՐՄԻՆ ՈՒՆԵՆԱԼՈՒ ՀԱՄԱՐ ԺՈՂՈՎՈՒՐԴԸ ՊԵՏՔ Է ՈՒՆԵՆԱ
ԱՌՈՂՋ ՀՈԳԻ,- ԱՍՈՒՄ Է «ՀԱՅԿԱԿԱՆ ՀԱՄԱԿԱՐԳ» ԳՐՔԻ ՀԵՂԻՆԱԿԸ
08-09-1998 19:20:00 | Հայաստան | Մշակույթ
ԵՐԵՎԱՆ, 8 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: 21-րդ դարի
աշխարհընկալումը, մարդու եւ ազգի էությունը, ազգային շահը եւ
գաղափարախոսությունը, երկրում կարգ ու կանոն հաստատելու
ճանապարհները` այս եւ արդիական այլ հարցերի է նվիրված Ռոմեն
Եպիսկոպոսյանի «Հայկական համակարգ» գիրքը, որը պատրաստվում է
տպագրության:
Աշխատության հեղինակի խոսքերով, Հայաստանի նորանկախ
հանրապետությունում ազգային միասնականության հասնելու համար առաջին
հերթին անհրաժեշտ է ունենալ համապատասխան հայեցակարգ, որը եւ
շարադրված է առաջարկվող գրքում: Ըստ նրա, իր հեղինակած գիրքը ոչ
միայն գործելու կոչ է, այլեւ պարունակում է պրակտիկ գործունեության
հրահանգներ եւ ուղիներ: «Առողջ մարմին` այսինքն, ճիշտ
քաղաքականություն եւ էֆեկտիվ տնտեսություն ունենալու համար մեր
ժողովուրդը պետք է ունենա առողջ հոգի»,- գտնում է հեղինակը:
Ռ. Եպիսկոպոսյանը «Նոյյան տապանի» թղթակցին տեղեկացրեց, որ
գիրքը չի հանվելու ազատ վաճառքի. այն տարածվելու է բաժանորդներին,
որոնց մի մասը ցանկություն են հայտնել ձեռք բերելով գիրքը եւ
ղեկավարվելով աշխատության դրույթներով` իրենց կարողությունների
չափով մասնակցել հայկական համակարգի կայացմանը:
Հեղինակը հայտնեց նաեւ, որ մոտ օրերս ծրագրված են իր
հանդիպումները գրքի ապագա ընթերցողների հետ, որտեղ կքննարկվեն
գրքում շարադրված տեսությանն առնչվող հարցեր: Սեպտեմբերի 9-ին նման
հանդիպում տեղի կունենա Երեւանի Ճարտարագիտական համալսարանում, իսկ
սեպտեմբերի 11-ին` ճարտարապետա-շինարարական ինստիտուտում: