«ԵՐԿՐԻ ՕՐ» ՄԻՋԱԶԳԱՅԻՆ ԲՆԱՊԱՀՊԱՆԱԿԱՆ ՄԻՋՈՑԱՌՄԱՆ
ՇՐՋԱՆԱԿՆԵՐՈՒՄ ԿԱԶՄԱԿԵՐՊՎԵՑ ԼՈՒՍԱՆԿԱՐՆԵՐԻ ՑՈՒՑԱՀԱՆԴԵՍ-ՎԱՃԱՌՔ
23-04-1998 21:33:00 | Հայաստան | Մշակույթ
ԵՐԵՎԱՆ, 23 ԱՊՐԻԼԻ, ՆՈՅՅԱՆ ՏԱՊԱՆ: Օրերս Երեւանում սկսված
«Երկրի օր» միջազգային բնապահպանական միջոցառման շրջանակներում
ապրիլի 23-ին Հայաստանի Ամերիկյան համալսարանի շենքում անցկացվեց
«Հայոց լեռնաշխարհ` բնության տաճարներ» խորագրով ֆոտոարվեստի
հեղինակային գործերի ցուցահանդես-վաճառք:
Ցուցահանդես-վաճառքը կազմակերպել է «Հայոց դպրոց» կրթամշակութային
միությունը, որի գործունեության հիմնական նպատակն է ստեղծել
բնապահպանական աշխարհայացքով օժտված նոր կենսաձեւ ու կրթական
համակարգ` ուղղված հոգեւոր ու նյութական ներուժերի բնականոն եւ
ներդաշնակ զարգացմանը: Դպրոցը նպատակ ունի պահպանել, ծաղկեցնել
եւ ավելի հարստացնել հայրենի բնաշխարհը:
«Հայոց դպրոց» միության տնօրենի խորհրդական Էդգար Վարդանյանը
տեղեկացրեց նաեւ, որ «Հայոց դպրոց» կրթամշակութային միության
համակարգում արդեն գործում է «Յոգա-բնաներդաշնակման կենտրոնը», որն
անցկացնում է բնաճանաչման այդ հինավուրց արվեստի (յոգայի)
համակարգված դասընթացներ: