«Հարավկովկասյան երկաթուղի» ՓԲԸ գլխավոր տնօրեն Վիկտոր Ռեբեցը հանդիպել է Հայաստանի Հանրապետության վարչապետ Տիգրան Սարգսյանի հետ: Հանդիպման ընթացքում կողմերը քննարկեցին ՀԿԵ-ի ներդրումային ծրագրի իրականացման եւ կոնցեսիոն պարտավորությունների կատարման ընթացքը, երկաթուղու 1-ին եռամսյակում կատարած աշխատանքները, 2012 թ. համար բեռնափոխադրումների զարգացման հեռանկարները: Ինչպես «Նոյյան Տապան»-ին հայտնեցին «ՀԿԵ» ՓԲԸ-ի հասարակայնության հետ կապերի ծառայությունից, ընկերության գլխավոր տնօրենը Հայաստանի Հանրապետության վարչապետին ներկայացրեց Զամանլուի կամրջի վերակառուցման եւ շրջակա երկաթուղային ենթակառուցվածքի զարգացման ծրագրի իրականացման ընթացքը, որը ներառում է վազուղիների եւ Շահալի, Փամբակ ու Վանաձոր կայարանների արդիականացումը: Ինչպես նշեց Վ.Ռեբեցը, Հարավկովկասյան երկաթուղին հատուկ ուշադրություն է դարձնում սեփական արտադրական հզորությունների հիման վրա շարժակազմի արդիականացմանը: Հայաստանի Հանրապետության վարչապետն ու «ՀԿԵ» ՓԲԸ գլխավոր տնօրենը քննարկեցին նաեւ կոնցեսիոն պայմանագրի շրջանակներում լրացուցիչ համաձայնագրի կնքման ընթացքը, սակագնային քաղաքականության պետական կառավարման հեռանկարները, մասնավորապես, պետության կողմից երկաթուղու համար ոչ շահավետ սակագների փոխհատուցման հնարավորությունը:

---