Հովիկ Մուսայելյան. Մենք նպաստում ենք արտագաղթի եւ ուղեղների արտահոսքի կասեցմանը
14-05-2012 16:53:23 | Հայաստան | Գիտություն եւ տեխնոլոգիաներ
Մայիսի14-ին Հայաստանի պետական ճարտարագիտական համալսարանում տեղի ունեցավ ՏՏ ոլորտում ՀՀ նախագահի ամենամյա կրթական պարգեւի մրցանակաբաշխության հանձնաժողովի ամենամյա ավանդական հանդիպումը մրցանակաբաշխության հավակնորդների հետ:
Մրցանակաբաշխությունն անց է կացվում 2005թ. ապրիլի 28-ին ՀՀ նախագահի հավանությամբ Սինոփսիս Արմենիա ՓԲԸ-ի եւ «Հայաստան» համահայկական հիմնադրամի միջեւ ստորագրված տեղեկատվական տեխնոլոգիաների (ՏՏ) ոլորտի լավագույն ուսանողներին եւ աշակերտներին ՀՀ նախագահի ամենամյա կրթական պարգեւների շնորհման վերաբերյալ համաձայնագրի շրջանակում:
Այս տարի ՀՊՃՀ-ում կազմակերպված հանդիպմանը մասնակցեցին մրցանակաբաշխությանը մասնակցող բուհերի՝ Հայաստանի պետական ճարտարագիտական համալսարանի (ՀՊՃՀ), Երեւանի պետական համալսարանի, Հայաստանի ամերիկյան համալսարանի, Հայ-ռուսական (Սլավոնական) համալսարանի եւ Եվրոպական տարածաշրջանային ակադեմիայի համապատասխան ֆակուլտետների ուսանողները, ինչպես նաեւ ՀՊՃՀ-ի Երեւանի ավագ դպրոցի, ԵՊՀ-ին կից ֆիզիկամաթեմատիկական դպրոցի, «Քվանտ» վարժարանի, Երեւանի «Անանիա Շիրակացի» ճեմարանի, Գյումրու «Ֆոտոն» վարժարանի, Վանաձորի «Էվրիկա» վարժարանի եւ «Մխիթար Սեբաստացի» կրթահամալիրի ուսանողներն ու աշակերտները:
Մրցանակաբաշխությունն անց է կացվում է 8-րդ անգամ՝ ՀՀ նախագահ Սերժ Սարգսյանի հովանավորությամբ եւ «Սինոփսիս Արմենիա» ՓԲԸ-ի ֆինանսավորմամբ:
2012թ. մրցանակաբաշխությունը կանցկացվի հուլիսին հետեւյալ անվանակարգերով՝
- Գլխավոր մրցանակ
- Լավագույն ասպիրանտ (I եւII կարգեր)
- Լավագույն մագիստրանտ (I եւII կարգեր)
- Լավագույն բակալավր (I եւII կարգեր)
- Լավագույն սփյուռքահայ մասնակից
- Լավագույն ուսանողուհի
- Լավագույն աշակերտ
Մրցանակաբաշխության հաղթողները կպարգեւատրվեն հոկտեմբերի 1-ին: Յուրաքանչյուր հաղթող կստանա դիպլոմ, դրամական պարգեւ մինչեւ 1200 դոլարին համարժեք դրամ եւ ՏՏ ոլորտը խորհրդանշող հուշախորհրդանիշ:
Անցած յոթ տարիների ընթացքում 201 ուսանող եւ աշակերտ արժանացել են այս պարգեւին:
Մրցանակաբաշխության մասին ազդարարող հանդիպմանը ՀՊՃՀ ռեկտոր Արա Ավետիսյանը նշեց, որ ՀՀ նախագահի կողմից մրցանակաբաշխության հովանավորումը վկայում է, որ կարեւորվում է գերակա հայտարարված տեղեկատվական տեխնոլոգիաների ոլորտի ապագան:
«Սինոփսիս Հայաստան»-ի գործադիր տնօրեն Հովիկ Մուսայելյանը լրագրողների հետ զրույցում ընդգծեց, որ միայն Հայաստանում անցկացվող մրցանակաբաշխությունը «իսկապես լուրջ թափ է հավաքել այս տարիների ընթացքում»: Ամենամեծ հաջողությունը, ըստ Հ.Մուսայելյանի, հաղթողների ակումբի ստեղծումն է: «Մենք բացահայտելով լավագույններին, կարողանում ենք նրանց ուղղորդել նաեւ տեխնոլոգիական ձեռներեցության ոլորտ»,- նշեց «Սինոփսիս Հայաստան»-ի գործադիր տնօրենը, հավելելով, որ մրցանակաբաշխության շրջանակներում ինտերակտիվ հարցազրույցների միջոցով բացահայտվում են հավակնորդների դատելու, Հայրենիքին նվիրված լինելու որակները: «Հարցերի միջոցով մենք կարողանում ենք նրանց քաղաքացիական դիրքորոշումն իմանալ եւ պարզել, որ նրանցից շատ-շատերը իրենց ապագան տեսնում են Հայրենիքում: Ես առավել քան համոզված եմ, որ մենք նպաստում ենք արտագաղթի եւ ուղեղների արտահոսքի կասեցմանը»,- ասաց Հ.Մուսայելյանը: