Զարգացող երկրների ընկերությունները, ի տարբերություն զարգացած շուկաների, համարում են, որ խոշոր սպորտային միջոցառումները շատ մեծ դեր ունեն ներդրումների ներգրավման գործում՝ հաղորդում է Գրանթ Թորնթոնի Միզազգային գործարար զեկույցը (IBR): Հետեւաբար, զարգացած երկրները առավել մեծ ջանքեր պետք է գործադրեն այս միջոցառումներից օգուտ քաղելու եւ գործարար շրջանակների աջակցությունը ձեռք բերելու համար: 2012-ի Օլիմպիական խաղերի մեկնարկի առիթով IBR հետազոտությունը բացահայտում է, թե որքան ավելի մեծ նշանակություն են հաղորդում նման միջոցառումների ներդրումներ գրավելու ունակությանը զարգացող շուկաներում: Օրինակ՝ Լատինական Ամերիկայում այդպես են կարծում հարցված ընկերությունների ղեկավարների 74 %-ը, BRIC (Բրազիլիա, Ռուսաստան, Հնդկաստան եւ Չինաստան) շուկաների ընկերությունների 54%-ը: Ի տարբերություն նրանց` զգալիորեն նվազ ցուցանիշներ են գրանցվել Եվրոպական միությունում՝ 42%, Հյուսիսային Ամերիկայում՝ 44% եւ միայն 36% Մեծ յոթնյակի երկրներում: Գրանթ Թորնթոն Մեծ Բրիտանիայի գլխավոր տնտեսագետ Ստեֆան Գիֆորդը մեկնաբանում է՝ «Հայտնի է, որ հյուրընկալող երկիրը միշտ առավելություն ունի սպորտային հաղթանակների տեսանկյունից, բայց նաեւ ակնհայտ է ներդրումներ գրավելու նրա առավելությունը: Զարգացող երկրների համար նման մասշտաբի սպորտային միջոցառումները դառնում են ցուցափեղկ՝ հնարավորություն տալով դուրս գալ համաշխարհային շուկա, ցուցադրել եւ վաճառել միանգամայն այլ հարթակներում: Զարգացած երկրների համար նրանք թերեւս նույնպես նոր հնարավորություններ են ընձեռում, սակայն դրանց դիտարկում են որպես ներդրումների ներգրավման մեծ գործընթացի միայն մի մասնիկ: Իհարկե, հասկանալի է, որ զարգացած երկրներն արդեն ունեն այն տարածքները, շինությունները, տրասպորտային եւ տեխնոլոգիական միջոցները, որ անհրաժեշտ են ցանկացած խոշոր միջոցառում հյուրընկալելու համար: Եւ նոր ենթակառուցվածքներ ստեղծելու համար այդ երկրներում արվող ներդրումների ծավալները զգալիորեն ավելի սահմանափակ են, քան, օրինակ, Չինաստանում եւ Բրազիլիայում»: Այնուամենայնիվ, Լոնդոնի Օլիմպիական խաղերի մեկնարկից մեկ շաբաթ առաջ էլ Միացյալ Թագավորության գործարարները (հարցվածների 61%) մեծ ոգեւորությամբ էին խոսում ներդրումների ներգրավման մասին: Ի դեպ, այս խաղերի հյուրընկալող երկրի կառավարությունն ակնկալում է առաջիկա 4 տարիներին 13 միլիարդ ֆունտ ծավալի տնտեսական օգուտ քաղել խաղերից, որից 6 միլիարդը բաժին է ընկնում օտարերկրյա ուղղակի ներդրումներին: Ստեֆան Գիֆորդն ավելացնում է՝ «Խոշոր միջազգային սպորտային միջոցառումներ հյուրընկալելու մրցավազքում հաղթելու համար երկիրը պետք է կարողանա համոզել հասարակությանն ու գործարարներին, որ ակնկալվող օգուտը էականորեն կարդարացնի ծախսերը: Մեր հետազոտությունը մատնանշում է, որ ներկայումս զարգացած շուկաների համար համոզիչ լինելը շատ ավելի դժվար է»: IBR-ը նաեւ ցույց է տալիս, որ հենց վերջերս մեծ սպորտային միջոցառումներ հյուրընկալած, կամ հյուրընկալելու պատրաստվող երկրների գործարարներն են առավել լավատես ներդրումների հարցում (բացառությամբ Չինաստանի, որտեղ Պեկինի 2008 թ-ի Օլիմպիական խաղերի թողած ժառանգության ծավալը շարունակում է մնալ չբացահայտված): Բրազիլիայի, որ 2014-ին հյուրընկալելու է ՖԻՖԱ-ի աշխարհի գավաթի խաղերը, իսկ 2016-ին՝ Օլիմպիական խաղերը, գործարարների 83%-ը հավատում է, որ սպորտը մեծ դեր ունի ներդրումների գրավման գործում: Նրանց հետ համակարծիք են այս տարվա Եվրոպայի առաջնությունն ընդունած Լեհաստանի գործարարների 82%, եւ 2010-ին ՖԻՖԱ-ի աշխարհի գավաթի խաղերը հյուրընկալած Հարավային Աֆրիկայի գործարարների 78%-ը:

---