«Սաբահ» թերթի հրապարակումը կազմակերպված արտահոսք է,- գտնում
է թուրքագետ Արտակ Շաքարյանը
11-02-2011 18:22:00 | Հայաստան | Քաղաքական
ԵՐԵՎԱՆ, 11 ՓԵՏՐՎԱՐԻ, ՆՈՅՅԱՆ ՏԱՊԱՆ: Ապրիլի 24-ին
Ցեղասպանության զոհերի հիշատակը հարգելու համար Թուրքիայից
Հայաստան պատվիրակ ուղարկելու մտադրության մասին թուրքական
«Սաբահի» հրապարակումը կազմակերպված արտահոսք է եւ նպատակ ունի
ստուգել սեփական հասարակության արձագանքը եւ Հայաստանին
նախապատրաստական ուղերձ հղել: Փետրվարի 11-ի ասուլիսում այսպիսի
տեսակետ հայտնեց թուրքագետ Արտակ Շաքարյանը: «Փաստորեն այս քայլով
թուրքերը մեզ զինաթափ են անում, չէի ասի` բոլոր զենքերից, բայց
գոնե մեկ զենքից, այսինքն` միջազգային հանրությանը ցույց են տալիս,
որ թեեւ մենք համաձայն չենք հայերի տեսակետի հետ, ամեն դեպքում,
որպես մարդ արարած, մենք նրանց հարգում ենք եւ ցավակցում»,- ասաց
նա:
Ա.Շաքարյանը գտնում է, որ առավել հավանական սցենարն այն է, որ
Թուրքիան այդ կերպ փորձելու է աշխարհին երեւալ որպես քաղաքակիրթ
երկիր ու միաժամանակ հենք ստեղծել, որ Օբաման ապրիլքսանչորսյան իր
ուղերձում կրկին չհնչեցնի «ցեղասպանություն» բառը: Այդուհանդերձ,
թուրքագետը գտնում, որ դա կարելի է օգտագործել Թուրքիայի կողմից
Հայոց ցեղասպանության ճանաչման գործընթացն արագացնելու համար: