«ART EXPO-2011»-ը ավելի լայնածավալ է ներկայացնում
պատմամշակութային ժառանգության ոլորտը
11-02-2011 17:28:00 | Հայաստան | Մշակույթ
ԵՐԵՎԱՆ, 11 ՓԵՏՐՎԱՐԻ, ՆՈՅՅԱՆ ՏԱՊԱՆ: Նախորդ տարիներից այս
ցուցադրությունը տարբերվում է նրանով, որ նկատելի է մրցակցության
աճ եւ ձգտում հասնել ավելի բարձր նշաձողի: Փետրվարի 11-ին «ART
EXPO-2011» արվեստների ցուցահանդեսի բացմանը այս մասին նշեց ՀՀ
մշակույթի նախարար Հասմիկ Պողոսյանը: Նախարարի գնահատմամբ, այս
ցուցադրությունը նախորդներից առանձնանում է հատկապես նրանով, որ
ավելի հստակ, ավելի լայնածավալ է ներկայացնում պատմամշակութային
ժառանգության ոլորտը:
Ինչպես նշեց «Ոսկե ծիրան» միջազգային կինոփառատոնի նախագահ
Հարություն Խաչատրյանը, «Ոսկե ծիրան»-ի նոր ծրագիրը շատ հագեցած է,
բացի հիմնական ծրագրերից, երիտասարդ կինեմատոգրաֆիստներին
առաջարկվել է «նոր կինո, նոր շունչ» բերել փառատոնին: Ներկայումս
աշխատանքներ են տարվում «Նոր հայացք» ծրագրի իրականացման
ուղղությամբ: Նախատեսվում է լատինաամերիկյան եւ իտալական ֆիլմերի
ռետրոսպեկտիվ ցուցադրություն: Փառատոնի շրջանակներում նշվելու են
հայազգի նշանավոր կինոգործիչների` Ռոման Բալայանի, Էդմոնդ
Քեոսայանի, Դմիտրի Կեսայանցի, հոբելյանները` նրանց կինոնկարների
ռետրոսպեկտիվ ցուցադրությամբ:
Շուրջ մեկ տարվա պատմություն ունեցող «Ռոբերտ Սահակյանց»
ստուդիայի հիմնադիրներից մեկը, ռեժիսոր-մուլտիպլիկատոր Դավիթ
Սահակյանցը հայտնեց, որ Ազգային կինոկենտրոնի հետ համատեղ
80-րոպեանոց մուլտֆիլմ-հեքիաթ է նկարահանվում Ղազարոս Աղայանի
«Անահիտ» հեքիաթի մոտիվներով: «Անիմացիան փորձում ենք անել
մաքսիմալ հարուստ, մաքսիմալ դինամիկ, մաքսիմալ հետաքրքիր նախ
երեխաների համար: Չենք մոռանում նաեւ մեծատասակներին` ֆիլմում
տեսարաններ կլինեն, որոնք հետաքրքիր կլինեն նրանց համար»,- ասաց
ռեժիսորը:
Հայաստանի ազգային կինոկենտրոնի տնօրեն Գեւորգ Գեւորգյանը
նշեց, որ առաջին անգամ հայկական կինոարտադրության պատմության մեջ
մտադիր են երկու հայկական ֆիլմ ներկայացնել Կաննի կինովառատոնին:
Դրանք Արամ Սուքիասյանի «Լուսապսակ» եւ Արտակ Իգիթյանի «Վանա լճի
լուսաբացը» ֆիլմերն են: Կինոկենտրոնի տնօրենը գոհունակություն
հայտնեց, որ եթե նախկինում տարեկան ընդամենը մեկ ֆիլմ էր
նկարահանվում, ապա ներկայումս տարեկան նկարահանվում են 7-ը: Միայն
2010թ. 14 հայկական ֆիլմ մասնակցել է 30-ից ավելի փառատոների,
բազում մրցանակներ ստացել:
Հայաստանի Մշակույթի նախարարության նախաձեռնությամբ եւ
«Էքսպոմեդիա» կենտրոնի կողմից կազմակերպված ցուցահանդեսին
մասնակցում են շուրջ 50 պետական եւ հասարակական մշակութային
կազմակերպություններ` թանգարաններ, ցուցասրահներ, թատերական,
համերագային կազմակերպություններ: