ԿԲ-ը կանխատեսում է թույլատրելի սահմանը գերազանցող գնաճ՝ մինչեւ 8%
11-06-2013 19:51:11 | Հայաստան | Տնտեսություն
Կենտրոնական բանկի խորհրդի անդամ Արթուր Ստեփանյանի կանխատեսմամբ, Հայաստանում գազի, էլեկտրաէներգիայի թանկացման եւ վերջերս տեղի ունեցած կարկտահարության հետեւանքով առաջիկա մեկ տարում կդիտվի մինչեւ 8%-ի գնաճ: Այս մասին Ա.Ստեփանյանը հայտարարեց այսօր լրագրողների հետ հանդիպման ժամանակ։ Նրա խոսքերով` այս տարվա համար Կենտրոնական բանկը կանխատեսել էր 4%-ի սահմաններում գնաճ, սակայն այդ թվերը, ցավոք, փոփոխվեցին:
Հիշեցնենք, որ դեռեւս երեկ Կենտրոնական բանկի նախագահ Արթուր Ջավադյանը Ազգային Ժողովում իր ելույթում նշել էր, որ որպես գազի, էլեկտրաէներգիայի թանկացման, ինչպես նաեւ կարկտահարության հասցրած վնասների հետեւանք նա կանխատեսում է հավելյալ 2,5 տոկոս գնաճ Հայաստանում։
ԿԲ-ն 1%-ով ավելի ցածր է կանխատեսում նաեւ տնտեսական աճը: «Եթե չլիներ գազի թանկացումը, մենք պատրաստվում էինք տնտեսական աճի ներուժը 6% գնահատել, սակայն գազի թանկացումից հետո աճի տեմպը գնահատում ենք 4.5-6 %»,- ասել է Կենտրոնական բանկի խորհրդի անդամը:
Միեւնույն ժամանակ նա հույս է հայտնել, որ 2014-ի կեսերից գները Հայաստանում կիջնեն: