Աշոտ Բլեյան. «Երկպալատ խորհրդարանի գաղափարը միջազգային
իրավունքի տեսակետից անընդունելի է»
04-02-2011 20:58:00 | Հայաստան | Քաղաքական
ԵՐԵՎԱՆ, 4 ՓԵՏՐՎԱՐԻ, ՆՈՅՅԱՆ ՏԱՊԱՆ: Հայաստանում երկպալատ
խորհրդարան ունենալու գաղափարը նոր չէ: Ինչպես փետրվարի 4-ի
ասուլիսում հայտարարեց «Ազգ» օրաթերթի գլխավոր խմբագիր եւ
Արմենական ռամկավար ազատական կուսակցության ատենապետ Հակոբ
Ավետիքյանը, այն ստեղծելու խոսակցություններ եւ սփյուռքահայությանը
միավորելու եւ ինչ-որ կերպ դրան ներկայացուցչական մարմնով օժտելու
ուղղությամբ փորձեր էին կատարվում նաեւ անցյալ դարի 70-ականներին,
սակայն դրանք բոլորը ձախողվել էին կամ տեղային մակարդակում մնացել:
Ըստ ԱՌԱԿ-ի ատենապետի, այդ գաղափարը պետք է մշակվեր ու քննարկվեր
մասնագետների կողմից եւ հետո միայն հրապարակ իջեցվեր:
Հ.Ավետիքյանը գտնում է, որ երկպալատ խորհրդարանի գաղափարը
երկքաղաքացիներին է վերաբերում: «Եթե նախորդ տարի` 2009թ.-ին, 4500
հոգի էր ընդունել երկքաղաքացիություն, ապա 2010-ին` 10 500 հոգի:
Եթե այս դինամիկան շարունակվի, ապա մի քանի տարի հետո 30-40 հազար
երկքաղաքացի կունենանք: Իսկ թե երկքաղաքացիները երկպալատանի
խորհրդարանի պարագայում ինչպես եւ որտեղ պետք է ներկայացված լինեն,
պարզ չէ: Եթե երկպալատ խորհրդարանի գաղափարը երկքաղաքացիներին է
վերաբերում, ապա այդ հարցում մենք միջազգային իրավունքի տեսակետից
խնդիրներ չենք ունենա: Սակայն հնարավոր է, որ բազմաթիվ այլ
խնդիրներ առաջանան»,- ասաց Հ.Ավետիքյանը:
Իսկ ըստ Երեւանի «Մխիթար Սեբաստացի» կրթահամալիրի տնօրեն Աշոտ
Բլեյանի, սփյուռքի նախարարի հայտարարությունը չի կարող իրատեսական
լինել, քանի որ դրա ստեղծումը բազմաթիվ իրավական խնդիրներ կարող է
առաջացնել ոչ միայն երկրի ներսում, այլեւ դրսում: «Երկրի ներսում
գուցե կարողանանք իրավական դաշտը հարմարեցնել երկպալատ խորհրդարանի
ձեւաչափին, սակայն միջազգային իրավունքի տեսակետից դա անընդունելի
է, հետեւաբար կհակասի նաեւ բազմաթիվ միջազգային ակտերի»,- նշեց
Ա.Բլեյանը: