Միրա Ֆորնեյ."Ցուցադրել եմ իրականությունը. պատմությունն ավելի մեղմ դարձնելը ճիշտ չէր լինի"
10-07-2013 14:31:34 | Հայաստան | Մշակույթ
«Ոսկե ծիրան» Երեւանի 10-րդ միջազգային կինոփառատոնում միջազգային խաղարկային մրցույթ անվանակարգում ներկայացված է «Իմ մարդասպան շունը» ֆիլմը: Հուլիսի 10-ին լրագրողների հետ հանդիպման ժամանակ ֆիլմի ռեժիսոր Միրա Ֆորնեյը այսպես ներկայացրեց իր ֆիլմը. «Սա իմ 2-րդ խաղարկային ֆիլմն է, այն գալիս է Սլովակիայից, բայց արծածված թեման եվրոպական է: Ֆիլմում կատարվող դժոխքը ոչ միայն Սլովակիայում կա, այլեւ ողջ աշխարհում, այն շատ լուրջ թեմա է եւ նման դժվար պատմության համար գեղեցիկ բնապատկեր ստեղծելն անհրաժեշտություն էր»:
Ըստ Մ. Ֆորնեյի, ֆիլմը 18-ամյա Մարեկի մեկ օրվա դրաման է: Նա ապրում է Սլովակիայի եւ Մորավիայի սահմանագծին՝ հոր եւ խուլիգան, ռասիստ հասակակիցների հետ, իսկ նրա լավագույն ընկերը, այնուամենայնիվ, շունն է: Մարեկի կյանքը տակնուվրա է լինում, երբ նա բացահայտում է իր կորած մոր՝ Մարիկայի գաղտնիքը:
«Ես բավականություն էի ստանում չկրթված դերասանների հետ աշխատելու ժամանակ, քանի որ դերասանները վարժված չէին, պարզապես ծանոթ էին խնդրին եւ ցանկացել են ներկայացնել խնդիրը: Ցուցադրել եմ իրականությունը, հետազոտություններ եմ անցկացրել սափրագլուխների հետ: Հավատացած եմ, որ պատմությունն ավելի մեղմ դարձնելը ճիշտ չէր լինի»,- ասում է ռեժիսորը:
Նշենք, որ այս ֆիլմը ռեժիսորին բերել է Տիբոր Վիծտարի մրցանակ` լավագույն սլովակյան սցենարի համար (2009), այն ներկայացվել է Բեռլինի ՄԿՓ-ի համատեղ արտադրության շուկայում (2010) եւ որպես ընթացիկ աշխատանք` պատվավոր հիշատակության արժանացել Սալոնիկի ՄԿՓ-ում (2012):
ՀԱՅԵՐԵՆ
Русский
English
Դաս. հայերեն
French
