Ահարոն Ադիբեկյան. «Մենք կարմիր գրքում ենք, կրճատվող ազգերի
ցուցակում»
31-01-2011 18:38:00 | Հայաստան | Հասարակություն
ԵՐԵՎԱՆ, 31 ՀՈՒՆՎԱՐԻ, ՆՈՅՅԱՆ ՏԱՊԱՆ: 2010թ.-ին Հայաստանում
արձանագրվել է 44 810 ծնունդ, կամ մոտ մեկ տոկոսով 2009թ.-ի
ցուցանիշից ավելի: Ինչպես հունվարի 31-ի ասուլիսում նշեց Ազգային
վիճակագրական ծառայության Մարդահամարի եւ ժողովրդագրության բաժնի
պետ Կարինե Կույումջյանը, մահացությունը 2009թ.-ի համեմատ անցած
տարի արճել է 1,6 տոկոսով եւ կազմել 28 800` նախորդ տարվա 27 560-ի
դիմաց: Ծնվածների թվաքանակը 2010թ.-ին մահացության ցուցանիշը
գերազանցում է 1,6 անգամ: Ծնելիության ցուցանիշը միջին
հանրապետականից բարձր է Արմավիրի, Գեղարքունիքի, Կոտայքի
մարզերում, իսկ Լոռու, Շիրակի. Սյունիքի, Վայոց Ձորի եւ Տավուշի
մարզերում` միջին հանրապետական ցուցանիշից ցածր է: Մահացության
ավելի բարձր ցուցանիշներ են արձանագրվել Արագածոտնի, Լոռու,
Շիրակի, Վայոց Ձորի եւ Տավուշի մարզերում: Մահացության առավել
հաճախ հանդիպող պատճառը արյան շրջանառության հետ կապված
հիվանդություններն են, ավելացել են նաեւ դժբախտ պատահարներից,
թունավորումներից եւ վնասվածքներից, նորագոյացություններից
մահացության դեպքերը:
Բնական հավելաճի ցուցանիշները Արագածոտնի, Արարատի, Արմավիրի,
Գեղարքունիքի, Կոտայքի մարզերում գերազանցում են միջին
հանրապետական ցուցանիշը` 5-ը, եւ կազմում յուրաքանչյուր հազար
բնակչի հաշվով 6-ի ավելի: Միջին հանրապետական ցուցանիշից գրեթե
կիսով չափ պակաս է բնական հավելաճը Լոռու, Սյունիքի եւ Տավուշի
մարզերում:
2010թ.-ին ամուսնությունները կազմել են 17 984` նախորդ տարվա
18 773-ի դիմաց, ամուսնալուծությունները` 2997, նախորդ տարվա
2829-ի դիմաց:
2009թ.-ին արձանագրված 498-ի դիմաց 2010թ.-ին 18,9 տոկոսով
աճել է ինքնասպանության եւ ինքնասպանության փորձերի թիվը եւ կազմել
592 ինքնասպանության եւ ինքնասպանության փորձի դեպք (225
ինքնասպանության եւ 367 ինքնասպանության փորձերի դեպքեր):
Ինքնասպանության եւ ինքնասպանության փորձ կատարածների շրջանում
գերազանցում են գործազուրկները, նպաստառուները եւ թոշակային տարիքի
անձինք:
Ըստ Կ.Կույումջյանի, 2010թ.-ին արձանագրվել է ժամանողների եւ
մեկնողների բացասական տարբերություն 4119 մարդով. Հայաստան ժամանել
են 7894-ը, մեկնել` 12013-ը:
«Սոցիոմետր» սոցիոլոգիական կենտրոնի ղեկավար Ահարոն
Ադիբեկյանի խոսքերով, «մենք կարմիր գրքում ենք, կրճատվող ազգերի
ցուցակում»: Նա նշեց, որ Հայաստանի բնակչությունը կազմում է իրեն շրջապատող
երկրների մոտ 300 մլն բնակչության մեկ տոկոսը, իսկ 30 տարի անց կկազմի կես
տոկոսից պակաս, որովետեւ «նրանք աճելու են, իսկ մենք կրճատվելու»: