Վերականգնվել է Հայաստանի գազամատակարարումը ամբողջական ծավալով
06-12-2010 15:38:00 | Հայաստան | Տնտեսություն
ԵՐԵՎԱՆ, 6 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Դեկտեմբերի 6-ի ժամը 12-ից վերականգնվել է Հայաստանի գազամատակարարումը ամբողջական ծավալով, որը օրական կազմում է 5,5-6 մլն խմ:
Հիշեցնենք, որ Հյուսիսային Կովկաս-Անդրկովկաս մայրուղային գազամուղի Սիոնի Գուդաուրի հատվածում հայտնաբերված վթարի վերականգնողական աշխատանքների պատճառով նոյեմբերի 24-ից ՀՀ մատակարարվող բնական գազի ծավալները նվազել էին մինչեւ 4 մլն խմ:
Չնայած մատակարարվող գազի ծավալների նվազմանը հանրապետության սպառողական շուկայում որեւէ փոփոխություն չի արձանագրվել, անխափան գազամատակարարումը ապահովվել է ներքին պահուստների հաշվին: