Ֆրանսիայի ԱԺ պատգամավոր Ռոլան Բլումը բարձրացրել է
ջավախահայության խնդիրները
26-04-2010 18:28:00 | Ֆրանսիա | Քաղաքական
ԹԲԻԼԻՍԻ, 26 ԱՊՐԻԼԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Ապրիլի
13-16-ը Ֆրանսիայի խորհրդարանականների պատվիրակության կազմում
Թբիլիսի կատարած այցի շրջանակներում, Ֆրանսիայի Ազգային ժողովի
պատգամավոր Ռոլան Բլումը Վրաստանի խորհրդարանի եւ կառավարության
ներկայացուցիչների հետ իր հանդիպումների ընթացքում բարձրացրել է
ջավախահայության իրավունքների ոտնահարման խնդիրը: Պատգամավորը նշել
է, որ վրացական իշխանությունները չեն լուծում ջավախահայության
առջեւ ծառացած խնդիրները էթնիկ փոքրամասնությունների պաշտպանության
եվրոպական ժողովրդավարական չափանիշներին համապատասխան: Այս մասին
հաղորդում են Հայրենադարձության եւ հիմնավորման հասարակական
կազմակերպությունների «Երկիր» միության մամլո ծառայությունից:
Իր հանդիպումների ընթացքում պրն Բլումը հատուկ կենտրոնացել է
վրացական իշխանությունների կողմից շինծու մեղադրանքներով 10 տարվա
ազատազրկման դատապարտված ջավախահայ քաղաքական գործիչ Վահագն
Չախալյանի գործի վրա: Ֆրանսիացի խորհրդարանականը նշել է, որ
վրացական իշխանությունները` հետապնդելով ջավախահայ ակտիվիստին,
առաջնորդվում են ակնհայտ քաղաքական շարժառիթներով: Վրացական
պաշտոնյաները չեն ընդունել պատգամավորի փաստարկները` փորձելով
համոզել պրն Բլումին, որ Վահագն Չախալյանը «մի սովորական խուլիգան»
է, որը կրում է իր «արժանի» պատիժը:
Ներկայացնելով Վրաստան կատարած այցի շրջանակներում Ջավախքի
խնդիրների շուրջ իր ունեցած քննարկումների արդյունքները` պրն
Բլումը հավաստիացրել է «Երկիր» միությանը, որ նա շարունակելու է
ջավախահայության իրավունքների պաշտպանության ուղղությամբ իր
ջանքերը եւ մասնավորապես, քայլեր է ձեռնարկելու Վահագն Չախալյանի
հարցը Եվրախորհրդի խորհրդարանական վեհաժողովի 2010 թ. ապրիլի
26-30-ի նստաշրջանում բարձրացնելու ուղղությամբ: