Օպերային ռեժիսուրայի հետ առնչություն չունեցող դերասանը նշանակվել է օպերային թատրոնի գլխավոր ռեժիսոր
30-10-2014 14:38:47 | Հայաստան | Մշակույթ
Սպենդիարյանի անվան օպերայի և բալետի թատրոնում կատարվող նշանակումներով հավանաբար նպատակ է դրվել բոլորիս զարմացնել ու զայրացնել: Մերթ օպերայի ու բալետի թատրոնի հետ որևէ առնչություն չունեցող և Արմեն Սմբատյանի հովանու ներքո գործող Անդրանիկ Արզումանյանն է գլխավոր տնօրեն նշանակվում, մերթ արտգործնախարարությունից ինչ-որ տիկին է նշանակվում օպերայի գլխավոր կարգադրիչ, մերթ էլ վաղուց որևէ բեմադրություն չարած Վիգեն Գալստյանն է նշանակվում գլխավոր բալետմայստեր:
Եվ այս ամենի նպատակն, իբր, թատրոնի նորացումն ու այն համաշխարհային չափանիշներին համադրելն է: Ու երևի հենց այդ «գաղափարի» իրականացման համար էլ օպերային թատրոնի գլխավոր ռեժիսոր է նշանակվել Վիգեն Ստեփանյանը:
Իսկապես, տարօրինակ նշանակում, որովհետև ճանաչված դերասան, դրամատիկական թատրոնի բեմադրիչ, նաև պիեսների հեղինակ Վիգեն Ստեփանյանն ամեն ինչ կարող էր լինել, բացի՝ օպերային թատրոնի գլխավոր ռեժիսորից: Որովհետև այս պաշտոնը պահանջում է օպերային ռեժիսուրայի իմացություն, կլավիրի ընթերցում, երաժշտադրամատիկական ժանրի խորագիտություն և այլն: Կյանքում երբևէ օպերային բեմադրություն չիրականացրած Վիգեն Ստեփանյանն ի՞նչ է անելու այս թատրոնում, որի գլխավոր խնդիրներից մեկը հենց օպերային ռեժիսուրայի բացակայությունն է, դժվար է ասել:
Թատրոնում տարակուսած են, շփոթված: Գնահատելով Վիգեն Ստեփանյանին որպես դերասան, այնուհանդերձ հարցնում են` ի՞նչ է անելու օպերային ռեժիսուրայի հետ առնչություն չունեցող մարդը:
ՀԱՅԵՐԵՆ
Русский
English
Դաս. հայերեն
French
