ՎԶԵԲ-ի մասնագետները Հայաստանի համար 2010թ.-ին կանխատեսում
են 2 տոկոսանոց տնտեսական աճ
16-02-2010 20:50:00 | Հայաստան | Տնտեսություն
ԵՐԵՎԱՆ, 16 ՓԵՏՐՎԱՐԻ, ՆՈՅՅԱՆ ՏԱՊԱՆ: Վերակառուցման եւ
զարգացման եվրոպական բանկի մասնագետները անցումային փուլում գտնվող
երկրների համար 2010թ.-ին միջինը 3,3 տոկոս տնտեսական աճ են
կանխատեսում: Ինչպես փետրվարի 16-ի ասուլիսում նշեց ՎԶԵԲ-ի գլխավոր
տնտեսագետ Ելենա Շվեյգերը, Հայաստանի համար կանխատեսվում է մոտ 2
տոկոսանոց տնտեսական աճ: Ըստ նրա, դանդաղ կվերականգնվի
շինարարության ոլորտը, հայկական արտադրանքի նկատմամբ պահանջարկի
մեծացմամբ պայմանավորված կարձանագրվի արտահանման աճ:
Ե.Շվեյգերի խոսքերով, երկրի բանկային համակարգի շնորհիվ
համաշխարհային ֆինանսատնտեսական ճգնաժամի առաջին փուլը չի հարվածել
Հայաստանին, սակայն ճգնաժամի բացասական հետեւանքները հետագայում են
զգացվել: Ըստ նրա, տնտեսության հիմնական աճն ապահովող
շինարարության ոլորտում արձանագրվել է 36,4 տոկոս անկում, կտրուկ
նվազեցին մասնավոր տրանսֆերտները:
Ե.Շվեյգերը նշեց նաեւ, որ տարածաշրջանի երկրներում տնտեսական
միջին անկումը կազմել է 6,1 տոկոս: Ըստ նրա, Հայաստանն այն 5
երկրների թվում է, որտեղ երկնիշ անկում է արձանագրվել:
ՎԶԵԲ-ի ներկայացուցիչ Ֆրեկլին Սթիվզի խոսքերով, ճգնաժամի
պայմաններում անցումային փուլում գտնվող երկրներում բարեփոխումներ
իրականացնելն ավելի դժվար եղավ, քանի որ հիմնականում տուժեց
բարեփոխումների շարժառիթ հանդիսացող միջին խավը, բարձրացավ
գործազրկության մակարդակը:
Մասնագետների կարծիքով, ճգնաժամը հաղթահարելու լավագույն
միջոցը բիզնես միջավայրի բարելավումն է, ինչը պետք է իրականացվի
կառավարության ջանքերով: Ըստ նրանց, չնայած Հայաստանի արտաքին
պարտքի միջոցների մեծ մասն արտոնյալ է, սակայն 2013թ.-ից պարտքի
մարման խնդիր կառաջանա: Ըստ ՎԶԵԲ-ի, արտաքին պարտքի պատշաճ
սպասարկման ճանապարհներից է երկրում տնտեսական աճի ապահովումը: