Երևանի քաղաքապետարանի տրանսպորտի վարչության պետ Հենրիկ Նավասարդյանից Lragir.am-ը հետաքրքվեց, թե տեղյա՞կ են առաջիկայում քանի նոր երթուղի է փակվելու: Նավասարդյանը խուսափեց պատասխանել ոլորտի խնդիրների վերաբերյալ մեր հարցերին: «Ճիշտն ասած՝ տեղյակ չեմ, բայց որ 7 երթուղի փակվել է, դրա մասին մենք հայտարարել ենք»,- ասաց նա: Հարցին, թե ի՞նչ քայլեր է ձեռնարկում Երևանի քաղաքապետարանը, որպեսզի նոր երթուղիներ չփակվեն և հասարակությունը տրանսպորտի խնդրի առաջ չկանգնի, Հենրիկ Նավասրարդյանը պատասխանեց, որ իրենք նախկինում էլ փորձեր արել են, որպեսզի երթուղիները չփակվեն, բայց ի վիճակի չեն եղել որևէ բան փոխել: Եթե առաջիկայում կարողանան, քայլեր կանեն, որպեսզի դա չկրկնվի:
«Անընդհատ էլ ձգտում ենք, որպեսզի երթուղիները չփակվեն, կարողնանք հնարավորինս շահագործենք, որպեսզի մեր բնակչությանը կարողանանք սպասարկել: Բայց մարդիկ չեն կարողանում ձեռնարկությունը պահել, ստիպված են լինում փակել»,- ասաց նա: Փոխադրողներն առաջարկում են Երևանում հասարակական տրանսպորտի ուղեվարձը սահմանել 200 դրամ և կոչ անում կառավարությանը սուբսիդավորել 100 դրամը: Ի պատասխան սրա, Հենրիկ Նավասարդյանն ասաց, որ քաղաքապետարանը սուբսիդիա տրամադրելու հարցը չի կարող քննարկել: