Բայց, իրադարձությունները զարգացան անկանխատեսելի տրամաբանությամբ, եւ պարզվեց, որ նոր քաղաքապետի պաշտոնի համար Սերժ Սարգսյանը հավանության է արժանացնում կրկին Գագիկ Ծառուկյանի հովանավորյալին՝ Վահագն Գեւորգյանին: Գեւորգյանն իհարկե Ծառուկյանի փեսան չէ: Ըստ երեւույթին, հետփետրվարյան ներիշխանական քվոտայով Ծառուկյանի փեսաներին տրված է քաղաքապետի մեկ պաշտոն, եւ այժմ այն զբաղեցնելու հերթը Հովիկ Աբրահամյանի որդունն է, որը առաջադրվել է Արտաշատի քաղաքապետի թեկնածու:
Բայց Աբովյանն էլ կարծեք թե թողնում են Ծառուկյանին: Համենայն դեպս ՀՀԿ-ն պաշտպանել է նրա թեկնածությունը, իսկ կուսակցությանը չլսելու եւ առաջադրվելու համար էլ հեռացրել Ծառուկյանի հետ կոնֆլիկտով հայտնի Արթուր Հարությունյանին՝ Պալաչին: Բայց, Պալաչը ՀՀԿ-ից հեռացվելուց հետո չհանեց իր թեկնածությունը եւ հայտարարեց, թե պայքարելու է: Դրանից հետո նրա անունով, հայրանունով եւ ազգանունով մեկ այլ Արթուր Հարությունյան գտնվեց, որը եւս առաջադրվեց քաղաքապետի թեկնածու: Այդ ամենն իհարկե վկայում էր կամ լուրջ պայքարի, կամ ծայրահեղ անլրջության մասին, որ ձեւավորվում էր Աբովյանի քաղաքապետի ընտրության շուրջ:
Այսօր հայտնի դարձավ, որ ոստիկանությունը բերման է ենթարկել Պալաչի եղբորն ու թիմակիցներին: Դրանից առաջ էլ մամուլում հրապարակում եղավ, որ Սերժ Սարգսյանը նրան հաղորդագրություն է հղել, որ թեկնածությունը հանի: Արդյոք Պալաչը որոշել էր չլսել Սերժ Սարգսյանին, եւ դրա համար գործի դրվեց ոստիկանությունը: Պալաչը կարո՞ղ էր ընդհանրապես առաջադրվել, գիտենալով, որ Սերժ Սարգսյանը կլինի դեմ: Դժվար է հավատալ դրան, հատկապես որ Պալաչն անկասկած լսած կլիներ Սերժ Սարգսյանի ելույթն այն մասին, թե ինքն էր ՀՀԿ-ականներին արգելել արտաբերել Դոդի Գագո մականունը: Իսկ Պալաչը նույնպես մականուն է:
Թեեւ, Հայաստանի դեպքում ընդհանրապես մականունի է վերածվում քաղաքականության հետ կապված ամեն ինչ, պետական կամ տեղական ինքնակառավարման կառուցների ձեւավորման հետ կապված որեւէ իրադարձություն: Նորմալ պետության պայմաններում նախագահի պաշտոնը զբաղեցնող անձի համար անհարմար կլիներ տեղեկությունը, թե որեւէ կերպ՝ թեկուզ միջնորդավորված ուղերձ է հղել ոմն Պալաչի, իսկ Հայաստանում այդ ամենը հանդիսանում է ուժի, իշխանության նշան:
Դատելով հայաստանյան տեղական կամ համապետական ընտրություններում ներգրավված անձանց, իշխանության գործողությունների տրամաբանության, բնույթի տարատեսակ դրսեւորումներից, պետությունը ոչ թե Հայաստանի կարգավիճակն է, այլ մականունը:
Աբովյանի քաղաքապետի ընտրությունը հանդիսանում է Հայաստանում իշխանության խնդրի լուծման գործընթացի դրվագներից մեկը: Փաստացի, այդ ընտրությունը կազմակերպվում է այնպես, որ Գագիկ Ծառուկյանը շարունակի լինել Աբովյանի «գլխավոր հովանավորը», բայց արդեն «սեփականատիրոջից» վերածվի «գործադիր տնօրենի», որը նշանակովի, կատարող պաշտոն է:
Այսինքն, եթե մինչ այդ Ծառուկյանի համար Աբովյանը իշխող համակարգի իր քվոտան էր, այժմ Սերժ Սարգսյանը նրա համար կազմակերպում է այնպիսի ընտրություն, որով Ծառուկյանին ցույց կտա, որ միայն իր միջամտության շնորհիվ նա կարող է հաջողություն ակնկալել մի քաղաքում, որտեղ նախկինում նրա հաջողությունը երաշխավորված էր հենց սկզբից:
Եթե մինչ այդ Ծառուկյանն էր նշանակում Աբովյանի քաղաքապետին, ապա այժմ Սերժ Սարգսյանը փորձում է ցույց տալ, որ նշանակովի են թե քաղաքապետը, թե Ծառուկյանը: