ՏՐԱՍԵԿԱ-ի երկրորդ ներդրումային համաժողովում Հայաստանը
կներկայացնի մի շարք ծրագրեր
17-12-2010 20:50:31 | Հայաստան | Տնտեսություն
ԵՐԵՎԱՆ, 17 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի տրանսպորտի
եւ կապի նախարար Մանուկ Վարդանյանը դեկտեմբերի 17-ին ընդունել է
ՏՐԱՍԵԿԱ միջկառավարական հանձնաժողովի նորանշանակ գլխավոր քարտուղար
Էդուարդ Բիրյուկովին: Վերջինս շնորհակալություն է հայտնել
նախարարին գլխավոր քարտուղարի պաշտոնում Հայաստանի կողմից իր
թեկնածությունը պաշտպանելու համար:
Մ.Վարդանյանը տեղեկացրել է, որ Հայաստանը մասնակցում է
ՏՐԱՍԵԿԱ ծրագրի շրջանակներում իրականացվող «Կովկասի եւ ԱՊՀ
արեւմտյան երկրների միջազգային լոգիստիկ կենտրոններ» նախագծի
աշխատանքներին: Ինչպես «ՆՏ»-ին հայտնեց ՀՀ տրանսպորտի եւ կապի
նախարարի մամուլի քարտուղար Սուսաննա Տոնոյանը, մասնավորապես
նախանշվել են լոգիստիկ կենտրոնի տարածքին երկաթգծի եւ
ավտոճանապարհի մոտեցման հնարավոր տարբերակները, ինչպես նաեւ
վերջիններիս «Հյուսիս-հարավ» ավտոմայրուղու եւ Երեւան շրջանցի հետ
միացման հնարավորությունները:
Մ.Վարդանյանը հայտնել է, որ 2011թ.-ին կայանալիք ՏՐԱՍԵԿԱ
երկրորդ ներդրումային համաժողովի ընթացքում նախարարության կողմից
կներկայացվեն մի շարք ծրագրեր: