«Քենդլ» կենտրոնի շենքի շինարարության համար կհատկացվի
համապատասխան տարածք
17-12-2010 20:26:43 | Հայաստան | Տնտեսություն
ԵՐԵՎԱՆ, 17 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: «Քենդլ» նախագծի
համակարգող խորհրդի դեկտեմբերի 17-ի նիստում, որը վարել է ՀՀ
վարչապետ, խորհրդի նախագահ Տիգրան Սարգսյանը, ի գիտություն է
ընդունվել Ռուսաստանի Դաշնության, Ֆրանսիայի, Գերմանիայի եւ
Չինաստանի հետ բանակցությունների արդյունքների եւ նախագծի
առաջընթացի համար անհրաժեշտ հետագա քայլերի վերաբերյալ ՀՀ
Կրթության եւ գիտության նախարարության Գիտության պետական կոմիտեի
նախագահ Սամվել Հարությունյանի զեկույցը:
Նիստում ներկայացվել է «Քենդլ» նախագծի իրականացման առաջին
փուլի` Գերմանիայի կողմից տրամադրված սարքավորման հիման վրա AREAL
լազերային բարձր հաճախականային գիտահետազոտական գծային արագացուցչի
կառուցման հարցը:
Տ.Սարգսյանը հանձնարարել է փոխվարչապետ, տարածքային
կառավարման նախարար Արմեն Գեւորգյանին` Գիտության պետական կոմիտեի
ու Պետական գույքի կառավարման վարչության հետ համատեղ
նախապատրաստել եւ ՀՀ կառավարության քննարկմանը ներկայացնել «Քենդլ»
կենտրոնի շենքի շինարարության համար համապատասխան տարածք
հատկացնելու մասին որոշման նախագիծ:
«Քենդլ» նախագծի իրականացման նախապատրաստական փուլի ղեկավարի
թեկնածության վերաբերյալ ծավալված քննարկման արդյունքում ղեկավար է
ընտրվել Երեւանի պետական համալսարանի «Սինքրոտրոնային ճառագայթման
օգտագործմամբ գիտահետազոտական կենտրոն» ԳՀԻ տնօրեն Վասիլի
Ցականովը: