Եկեղեցիների համաշխարհային խորհրդի գործադիր կոմիտեն վերահաստատել է Հայոց ցեղասպանության ճանաչումը
19-06-2015 17:42:25 | Հայաստան | Մամլո հաղորդագրություն
Վաշինգտոն- Նախորդ շաբաթ, Եկեղեցիների համաշխարհային խորհրդի (ԵՀԽ) գործադիր կոմիտեի 20 հոգանոց պատվիրակությունն այցելել է Հայաստան: ԵՀԽ պատվիրակությունը առաջինն այցելել է Մայր Աթոռ Սուրբ Էջմիածին` որպես խմբի ամենամյա էկումենիկ ուխտագնացություն: Էջմիածնում պատվիրակությունը գործնական հանդիպումներ է ունեցել ԵՀԽ նախագահ Ն.Ս.Օ.Տ.Տ. Ամենայն Հայոց Կաթողիկոս Գարեգին Բ-ի հետ, որտեղ ընդունվել է Հայոց ցեղասպանության 100-րդ տարելիցի վերաբերյալ հայտարարությունը:
ԵՀԽ գործադիր կոմիտեն Էջմիածնում, Հայաստան: Լուսանկարը` Քրթեսի Մարիան Էդջերսթեն/ԵՀԽ
«Միևնույն պատմական և քաղաքական համատեքստում Հայոց ցեղասպանությունն ուղեկցվել է հիմնականում քրիստոնեական, այդ թվում` արամեական, խալդիական, սիրիական, ասորական և հունական համայնքների դեմ ցեղասպան գործողություններով, որոնք 20-րդ դարի սկզբին սևացրել են պատմության էջերը»,-ասվում է հայտարարության մեջ:
«Ժխտումը, անպատժելիությունը և նման դեպքերը մոռացության մատնելը խրախուսում են դրանց կրկնությունը: Նրանք, ովքեր մերժում են, սպառնում քրոջ կամ եղբոր կյանքին և արժանապատվությանը, խաթարում և ոչնչացնում են թե՛ զոհի, թե՛ սեփական մարդկային կերպարը: 100-րդ տարելիցի հիշատակի այս արարողությունները պետք է նշանավորեն այն, որ անցել են ժամանակները, երբ կառավարությունները շարունակում են ցեղասպանություն չորակել այն, ինչը տեղի է ունեցել մեկ դար առաջ: Կոչ ենք անում բոլոր կառավարություններին հրաժարվել ժխտման այդ դիրքորոշումից»:
«Այս 100-րդ տարելիցին կոչ ենք անում միջազգային հանրությանը, ԵՀԽ անդամ եկեղեցիներին և հավատացյալ ու բարի կամքի տեր բոլոր մարդկանց հիշել և վերստին բռնել ցեղասպանությունների ու մարդկության դեմ բոլոր հանցագործությունների կանխարգելման ուղին»:
Պատվիրակության անդամներն Էջմիածնից ժամանեցին Երևան` հարգանքի տուրք մատուցելու Ծիծեռնակաբերդ հուշահամալիրում: Այնտեղ նրանք աղոթեցին և ծաղկեպսակ դրեցին` ի հիշատակ 1915թ. Հայոց ցեղասպանության ընթացքում զոհված 1.5 միլիոն հայորդիների:
ԵՀԽ պատվիրակության անդամներն աղոթում են Ծիծեռնակաբերդի հուշահամալիրում
«Շարունակելով ընթանալ ժամանակից առաջ, 1983 թ-ից ի վեր ԵՀԽ-ն պարբերաբար միջազգային հանրությանը կոչ է անում ճանաչել Հայոց ցեղասպանությունը»,- նշել է ԱՄՆ-ի Հայաստանյայց ուղղափառ եկեղեցու էկումենիկ գրասենյակի գործադիր տնօրեն և թեմական պատվիրակ Տ. Վիգեն արքեպիսկոպոս Այքազյանը: «Հայ ժողովուրդը բարձր է գնահատում Գերաշնորհ Օլավ Ֆյուկսե Թվեյթի ու ողջ ԵՀԽ գործադիր կոմիտեի աշխատանքը: Երախտապարտ ենք նրանց՝ Հայաստան այցելության և Հայոց ցեղասպանության 100-րդ տարելիցը հավուր պատշաճի հիշատակելու համար»,- ասաց արքեպիսկոպոս Այքազյանը: