Ինքը՝ Սերժ Սարգսյանը, արդեն հայտարարել է, որ չի պատրաստվում դառնալ նախագահ կամ վարչապետ, նրա անունից հայտարարվում է, որ խորհրդարանի խոսնակ էլ չի դառնալու: Սակայն ոմանց, այլ փաստարկների բացակայության պայմաններում, ձեռնտու է պնդել, որ Սարգսյանը չի պահի խոսքը եւ կզբաղեցնի երեք գլխավոր պաշտոններից մեկը: Ոմանք էլ պարզապես չեն հավատում Սարգսյանի հայտարարություններին եւ կարծում են, որ անհրաժեշտության դեպքում նա կարող է զբաղեցնել այն պաշտոնը, որն անհրաժեշտ կհամարի:
ԱԱԾ ղեկավար Գորիկ Հակոբյանը հայտարարել էր, որ ժողովուրդը չի հավատում կառավարությանը: Նա ասել էր Նաիրիտի հարցով, որի աշխատակիցներին մեկ տարուց ավելի չեին վճարում աշխատավարձը՝ ամեն անգամ խաբելով նրանց: Գորիկ Հակոբյանի հայտարարությունը, երեւի, իր ազդեցությունն էր ունեցել, եւ մի քանի օր անց նաիրիտցիները ստացել էին իրենց աշխատավարձը:
Սակայն Գորիկ Հակոբյանի բարձրացրած խնդիրը մնացել է. մարդիկ իրոք չեն վստահում իշխանությանը: Մարդկային համակեցությունն արդեն երկար դարեր պահվում է «ազնիվ խոսքի» վրա, իսկ օրենքները ստեղծվում են, որպեսզի ազնիվ խոսքը չխախտվի: «Ազնիվ» բառի հիմքում «պատիվ» հասկացությունն է, եւ դա պատահական չէ:
Հայաստանում «պատիվն» ու «ազնվությունը» վաղուց բացակա են քաղաքական հարաբերություններում, եւ հանրությունն իր ղեկավարներից պատվի դրսեւորումներ չի սպասում: Հենց այդ պատճառով ոչ ոք չի հավատում իշխանության խոստումներին, արդարադատությանը, Հովիկ Աբրահամյանի վիճակագրությանը, զարգացման եվրասիական ուղու օգտին փաստարկներին, քարոզչությանը:
Զարգացած հասարակություններում պետական քաղաքականությունը կառուցվում է պատվի հասկացության վրա, եւ ստի մեջ բռնված պաշտոնյան անմիջապես հրաժարական է տալիս: Հայաստանում ոչ ոք չի վախենում, որ կբռնվի ստի մեջ: Դրա վառ օրինակն է էներգետիկայի նախկին նախարար Արմեն Մովսիսյանը, ով երկար տարիներ գիտակցաբար ստել է հանրությանը, իսկ որպես «պատիժ» ստացել նախագահի խորհրդականի պաշտոնը:
Ավելի վառ օրինակ է Սյունիքի մարզպետ Սուրիկ Խաչատրյանը, ում պատգամավոր Նիկոլ Փաշինյանը խորհրդարանի ամբիոնից անվանել է մարդասպան, եւ Խաչատրյանը դա պատվի ու արժանապատվության վիրավորանք չի համարել:
Ինչ-ինչ պայմանավորվածությունների հասնելով՝ պաշտոնյաները եւ գործարարները, ինչպես բանկերը, երաշխիքներ կամ էլ գրավ են պահանջում: Սերժ Սարգսյանն ի՞նչ երաշխիքներ կարող է տալ, կամ ի՞նչ կարող է առաջարկել հանրությանը որպես գրավ: