Նիդեռլանդները ևս դադարեցրել է բոլոր չվերթները դեպի Շարմ Էլ Շեյխ

05-11-2015 18:55:59 | Նիդեռլանդներ | Հասարակություն

Նիդեռլանդների ԱԳՆ-ն որոշել է կասեցնել հոլանդական ավիաընկերությունների բոլոր չվերթները դեպի եգիպտական Շարմ Էլ Շեյխ և հակառակ ուղղությամբ: Անվտանգության նկատառումներից բխող միջոցառումներն ամենաքիչը կգործեն մինչև նոյեմբերի 8-ը:

Այս մասին գրում է lenta.ru-ն` վկայակոչելով NL Times-ին:

Աղբյուրի տեղեկացմամբ` բացի այդ, դիվանագիտական կառույցը նաև հանձնարարել է խուսափել Սինայական թերակղզու վրայով կատարվող թռիչքներից:

Երկրի կառավարությունը քաղաքացիներին հորդորել է ձեռնպահ մնալ նշյալ ուղղություններով թռիչքներից, քանի դեռ չկան նոր տեղեկություններ օրերս այդ վայրում ռուսական ինքնաթիռի կործանման բուն պատճառների մասին:

Այնտեղ գտնվող հոլանդացիներին խորհուրդ է տրվում դիմել իրենց զբոսաշրջային գործակալություններ:

Նիդեռլանդների ԱԳՆ-ի տվյալներով` ներկայումս Շարմ Էլ Շեյխում հանգստանում են այդ երկրի 408 քաղաքացի:

Նշվում է, որ հոլանդական իշխանությունները սպասում են տվյալ հանգստավայրում անվտանգության պայմանների վերաբերյալ բրիտանական հետաքննության արդյունքներին:

Ավելի վաղ, նմանատիպ որոշում էր կայացրել նաև Մեծ Բրիտանիայի ԱԳՆ-ն:

Նոյյան տապան - Հասարակություն