Հայաստանի սահմանամերձ, բարձրլեռնային և լեռնային 344 գյուղեր ապահովվել են անվճար Wi-Fi-ով
13-11-2015 11:43:49 | Հայաստան | Գիտություն եւ տեխնոլոգիաներ
ՀՀ հեռավոր, սահմանամերձ, բարձրլեռնային և լեռնային մինչև 1000 բնակիչ ունեցող թվով 344 գյուղական բնակավայրերում տեղադրվել են անլար (Wi-Fi երթուղղիչ) ինտերնետ ցանցի սարքեր, որոնց շնորհիվ գյուղացիները հնարավորություն կունենան անվճար օգտվել ինտերնետի ընձեռած հնարավորություններից:
Ծրագրի հիմնական նպատակն է ապահովել ինտերնետային հասանելիությունը և բարձրացնել դրա կիրառելիության մակարդակը Հայաստանի գյուղական համայնքներում։
WiFi մոդեմները դրված են յուրաքանչյուր գյուղի որևէ հասարակական վայրում՝ դպրոցում, քաղաքապետարանում կամ մշակույթի տանը։ Մեկ մոդեմին միաժամանակ կարող է միանալ մինչև 25 մարդ։
Ծրագիրը, որը մեկնարկել է 2015թ. հունվարին, համակարգում է Ձեռնարկությունների ինկուբատոր հիմնադրամը՝ ՀՀ կառավարության և Համաշխարհային բանկի աջակցությամբ:
Ծրագիրը կտևի մեկ տարի, որից հետո մոդեմները կտրամադրվեն համայնքներին։
Հաջորդ 2 տարում կապը պետք է ապահովեն տեղական ինքնակառավարման մարմինները։
Հայաստանում էլեկտրոնային հասարակության ձևավորման համար մեծածավալ աշխատանք է իրականացվել:
Օրինակներից է «Համակարգիչ բոլորի համար» ծրագիրը, որն ավելացրել է մարզերում համակարգչից օգտվողների թիվը: Հաջորդ քայլը ինտերնետ օգտագործողների թվի աճին նպաստելն է, ինչը կիրագործվի նաև ՁԻՀ-ի կողմից համակարգվող «ՀՀ գյուղերում անլար (Wi-Fi երթուղղիչ) ինտերնետ ցանցի սարքերի մատակարարում և տեղադրում» ծրագրի միջոցով: