Թուրքիայի հարավ-արևելքում հնչած պայթյունների հետևանքով 3 ոստիկան է զոհվել
15-12-2015 19:32:46 | Թուրքիա | Հասարակություն
Թուրքական Դիարբեքիր նահանգում ոստիկանական զրահապատ մեքենայի վրա կատարված հարձակման հետևանքով զոհվել է երեք ոստիկան:
Tass.ru-ի փոխանցմամբ` հարձակումը տեղի է ունեցել Սիլվան գավառում, երբ զրահապատ մեքենան տեղափոխել է ոստիկանական հատուկ ուժերին և նրա ճանապարհին պայթեցվել է ռումբ:
Նախնական տեղեկություններով` պայթուցիկը գործի են դրել Քրդական բանվորական կուսակցության զինյալները:
Հարձակումից հետո գավառում սկսվել են զինյալների հայտնաբերման և վնասազերծման գործողություններ:
Նշենք, որ Դիարբեքիրում երկրորդ օրն է, ինչ շարունակվում են բախումները ոստիկանների և ցուցարարների միջև: Տեղի ակտիվիստների մի մասը դեմ է արտահայտվում իշխանությունների կողմից մի քանի շրջաններում պարետային ժամ հայատարարելուն:
Ավելի վաղ, Սուր գավառում տեղի ունեցած բախումների արդյունքում զոհվել էր երկու մարդ, վիրավորվել 17-ը: Բնակչության մեծ մասը ժամանակավորապես լքել են իրենց տները և տեղափոխվել հարևան շրջաններ:
Պարետային ժամ հայտարարելու իշխանությունների որոշումը պայմանավորված է հակաահաբեկչական գործողություններով, որոնք իրականացվում են անվտանգության ուժերի կողմից:
Նմանատիպ հատուկ դրություն է հայտարարված նաև Շիրնակ նահանգի երկու գավառներում, որոնք սահմանակից են Իրաքի և Սիրիայի հետ: