Թունիսում բողոքի ակցիաների արդյունքում ձերբակալվել է 800 մարդ
25-01-2016 13:01:42 | Թունիս | Հասարակություն
Թունիսում պարետային ժամի խախտման համար ձերբակալվել է 800-ից ավելի մարդ: korrespondent.net-ի փոխանցմամբ` այդ մասին հայտարարել է Թունիսի Ներքին գործերի նախարար Վալիդա Լուգանը:
Նրա խոսքերով` ընդհանուր առմամբ 538 մարդ ձերբակալվել է թալանի և երկրի տարբեր շրջաններում վանդալիզմ իրականացնելու համար, ուստի նրանք պատասխանատվության են ենթարկվելու: Նրանք մեղադրվում են մասնավոր և հանրային սեփականությունը խախտելու, ինչպես նաև քաղաքացիների վրա հարձակվելու մեջ: Բացի այդ, ևս 300 մարդ ձերբակալվել է պարետային ժամի դրությունը խախտելու համար:
Վ. Լուգանը նաև տեղեկացրել է, որ անկարգությունների արդյունքում տուժած անվտանգության աշխատակիցների թիվը կազմում է 113 մարդ:
Նշենք, որ Թունիսի իշխանությունները հունվարի 22-ին հայտարարել էին երկրի ամբողջ տարածքում պարետային ժամ մտցնելու մասին: Երկրի կառավարությունը ստիպված էր եղել նման քայլի գնալ աղքատության և գործազրկության դեմ ուղղված մի քանի օր շարունակվող բողոքի ակցիաների պատճառով: