Նորարար խաչուկներ, որոնք մեկտեղում են մինչ օրս գոյություն ունեցողների բոլոր ֆունկցիաները
14-03-2016 16:56:49 | Հայաստան | Գիտություն եւ տեխնոլոգիաներ
Հայաստանում ստեղծվել են սալիկների (tile, кафельная плитка) բազմա-ֆունկցիոնալ նոր բաժանարարներ (խաչուկ, tile spacer), որոնք կատարում են սալիկների ճիշտ տեղադրման համար անհրաժեշտ բոլոր ֆունկցիաները, այդ թվում սալիկների ցանցաձև և պատշար ոճի շարվածքներ: Նորարարության հեղինակը մաթեմատիկոս, ծրագրավորող, դիզայներ, 3D մոդելավորող, գյուտարար, 30-ից ավելի պատենտների հեղինակ Վոլոդյա Ոսկանյանն է: Վերջինս նաև Գիտությանը, նորարարական տեխնոլոգիաների զարգացմանը և հեռանկարային լուծումերին աջակցող «Նոյյան Տապան» Հիմնադրամի նախաձեռնած «Գյուտարարների ակումբ»-ի անդամ է:
Ըստ նրա` նոր խաչուկների միջոցով հնարավոր է հեշտությամբ ստուգել (Level Ctrl) դրա շուրջը շարված սալիկների մակարդակի ճշտությունը` առանց հարթաչափ օգտագործելու:
«Շատ ընկերություններ արտադրում են տարբեր տեսակի խաչուկներ, ինչը նշանակում է, որ դրանց պահանջարկն ամբողջ աշխարհում շատ-շատ է»,- «Նոյյան Տապան»-ի թղթակցի հետ զրույցում նշեց հայ գյուտարարը` հավելելով, որ գոյություն ունեցող T-ձև, խաչաձև կամ սեպաձև խաչուկների ֆունկցիաները մեկտեղվել են իր ստեղծած նոր խաչուկներում:
Վ. Ոսկանյանի փոպանցմամբ` նոր խարչուկները կարելի է օգտագործել բազմաթիվ անգամներ, քանի որ դրանք օգտագործման հաջորդ օրը հեշտությամբ հանվում են, ավելին` դրանք հնարավորություն են տալիս նույնիսկ ոչ մասնագետին արագ և որակով տեղադրել սալիկներ:
Հայ գյուտարարն իր ստեղծած խաչուկների մասին տեղեկատվությունը տեղադրել է նաև այս https://www.indiegogo.com/projects/multi-function-tile-spacer#/ կայքում, որի միջոցով ցանկացողները կատարում են նվիրատվություններ` ներկայացված լավ գաղափարներին ֆինանսական աջակցություն ցույց տալու և իրականություն դարձնելու համար:
Վ. Ոսկանյանի խոսքերով` ինքը մեծ ցանկություն ունի Հայաստանում կազմակերպել նոր խաչուկների արտադրություն, սակայն չունի համապատասխան ֆինանսական միջոցներ, ուստի փնտրում է ներդրողներ:
«Կոպիտ հաշվարկներով 80-100 հազար դոլար գումար է անհրաժեշտ խաչուկների լայն արտադրություն կազմակերպելու համար, խնդիրը համապատասխան սարաքավորումներ ձեռք բերելու մեջ է»,- նշեց նա: