Հայկական երաժշտությունը ջերմությամբ է ընդունվում «Ալ Բուստանում»
16-03-2016 17:16:13 | Լիբանան | Մշակույթ
Հայաստանի պետական երիտասարդական նվագախումբը մշտապես կարևորում է հայ կոմպոզիտորների ստեղծագործությունների հնչեցումն արտասահմանյան հյուրախաղերի ընթացքում։
Բեյրութում անցկացվող «Ալ Բուստան» միջազգային փառատոնի մարտի 15-ի համերգը բացվեց Ջիվան Տեր-Թադևոսյանի Լիրիկական պոեմով։ Հանդիսատեսը շատ ջերմորեն ընդունեց այս ստեղծագործությունը։
Երեկոյի ընթացքում տաղանդավոր թավջութակահար Էդգար Մորոն Երիտասարդական նվագախմբի նվագակցությամբ կատարեց Սերգեյ Պրոկոֆևի Սիմֆոնիա-կոնցերտը թավջութակի և նվագախմբի համար։
Համերգի երկրորդ բաժնում Սերգեյ Սմբատյանի գլխավորությամբ հնչեց Մոդեստ Մուսորգսկու Պատկերներ ցուցահանդեսից ստեղծագործությունը (փոխադրությունը՝ Մորիս Ռավելի)։
Հանդիսատեսը բաց չէր թողնում Հայաստանի պետական երիտասարդական նվագախմբին և դիրիժորին՝ պահանջելով բիս։
Նվագախումբը կատարեց Արամ Խաչատրյանի հանրահայտ «Սուսերով պարը» «Գայանե» բալետից։
Հիշեցնենք, որ Հայաստանի պետական երիտասարդական նվագախումբը երրորդ տարին անընդմեջ հանդես է գալիս «Ալ Բուստան» միջազգային փառատոնում որպես պաշտոնական նվագախումբ։ Երիտասարդականը «Ալ Բուստան» փառատոնին է մասնակցում ՀՀ մշակույթի նախարարության աջակցությամբ։ Հայաստանի պետական երիտասարդական նվագախմբի գլխավոր գործընկերն է ՎիվաՍել ՄՏՍ-ը։
ՀԱՅԵՐԵՆ
Русский
English
Դաս. հայերեն
French
