45 տարի է անցել այն օրվանից, երբ այս հատվածում ողբերգական ավտովթարի հետևանքով հայ ժողովուրդը կորցրեց իր տաղանդավոր զավակներից մեկին` հայ մեծանուն բանաստեղծ Պարույր Սևակին:
Ամեն տարի հունիսի 17-ին` մեծ գրողի մահվան օրը սևակապաշտ հայությունն այցելում է նրա ծննդավայր` Արարատի մարզի Զանագակատուն գյուղ: Այս տարի Պարույր Սևակի հիշատակման արարողությունը նշանավորվեց տուն-թանգարան տանող ճանապարհին «Տո լա՜ճ տնավեր…» անվանմամբ կոթողի բացումով, որը բանաստեղծի 100-ամյակին նվիրված «Կոչեմ ապրողաց» խորագրով քանդակաշարի առաջին կոթողն է:
ՀՀ ժողովրդական վարպետ, նկարիչ-խաչքարագործ Վարազդատ Համաբարձումյանի հեղինակած հուշակոթողի բացման հանդիսավոր արարողությունը մեկնարկեց քահանայի կողմից հուշակոթողի օծմամբ և օրհնությամբ:
Վարպետի պարզաբանմամբ` «Տո լա՜ճ տնավեր…» կոթողի մեջտեղում թևատված և գլխատված խաչն է, որը խորհրդանշում է Հայոց ցեղասպանությանը զոհ գնացած մտավորականությանը` հիմքում նկատի ունենալով Կոմիտասին, իսկ ներքևի և վերևի զանգերի կոչնակները խորհրդանշում են նահատակված 1,5 մլն հայերի ապշած հայացքները` ուղղված անտարբեր աշխարհին:
Միջոցառմանը ներկա էին մի շարք բարձրաստիճան պաշտոնյաներ, Զանգակատուն գյուղի բնակիչները և բազմաթիվ հյուրեր: Վերջիններս ծաղիկներ խոնարհեցին հայրենի տան բակում թաղված բանաստեղծի գերեզմանաքարի մոտ:
Զանգակատան բնակիչները փաստում են, անմահության ճանապարհը բռնած գրողի թե ծննդյան, թե մահվան տարելիցները մշտապես նշվում են նրա տուն-թանգարանում, որտեղ հավաքվածները բացառիկ առիթ են ունենում Պարույր Սևակի ընկերների շուրթերից լսել ու վերհիշել սիրված գրողի կյանքից հետաքրքիր դրվագներ: Հիշատակման միջոցառումներին մասնակից են դառնում նաև Զանգակատան դպրոցահասկաները, ովքեր մեծ հպարտությամբ ասմունքում են իրենց պաշտելի Սևակի ստեղծագործությունները:
Խաչքարագործ Վարազդատ Համաբարձումյանը հույս ունի, որ Պ. Սևակի տուն-թանգարան տանող ճանապարհի այդ հատվածը կդառնա յուրահատուկ մի պուրակ, որտեղ կանգնեցված կոթողը կոգեշնչի անցորդներին հետաքրքրվելու և շփվելու մեծ բանաստեղծի հետ:
Էլիզա Զախարյան, «Նոյյան Տապան»
Տեսանյութը եւ լուսանկարներն այստեղ` «Նոյյան Տապանի»