Ըստ ճշտված տվյալների, Մոսկվայի մետրոյում պայթյունների
հետեւանքով վիրավորների թվում են երեք հայազգիներ
02-04-2010 21:00:00 | Ռուսաստան | Հասարակություն
ՄՈՍԿՎԱ, 2 ԱՊՐԻԼԻ, ՆՈՅՅԱՆ ՏԱՊԱՆ: Ըստ ՌԴ-ի
առողջապահության նախարարության ապրիլի 2-ին հրապարակած տվյալների,
Մոսկվայի մետրոյի «Լուբյանկա» եւ «Պարկ կուլտուրի» կայարաններում
մարտի 29-ի պայթյունների հետեւանքով վիրավորվածներից 84-ը դեռեւս
տարբեր հիվանդանոցներում են: Նրանցից երկուսի վիճակը գնահատվում է
ծայրահեղ ծանր, 12-ինը` ծանր, 29-ինը` միջին ծանրության, 41-ինը`
բավարար:
Վիրավորների թվում են երեք հայազգիներ. ի լրումն 18-ամյա
Հասմիկ Ժորայի Մարտիրոսյանի եւ 55-ամյա Աննա Հովհանննեսի
Փորքաշյանի, որոնց մասին տեղեկությունը հրապարակվել էր պայթունից
ժամեր անց, հայտնի դարձավ նաեւ հիվանդանոցում գտնվող 53-ամյա
Սերգեյ Ասքանազի Պողոսյանի մասին:
Երկու պայթյունների հետեւանքով զոհվածերի թիվը հասել է 40-ի.
ապրիլի 2-ին հիվանդանոցում մահացել է 51-ամյա, ազգությամբ ռուս,
տղամարդ: Հիշեցնենք, որ զոհերի թվում է նաեւ ՌԴ-ի քաղաքացի,
17-ամյա հայազգի Վալենտինա Հովհաննեսի Եղիազարյանը, ով ստացած
վերքերից մահացել է հիվանդանոցում:
Պայթյունների կապակցությամբ հարուցված է
քրեական գործ ՌԴ-ի քրեական օրենսգրքի 205-րդ`«Ահաբեկչություն»
հոդվածով: Պայթյունները, ըստ նախնական վարկածի, իրականացրել են
երկու մահապարտ կին ահաբեկիչներ, որոնց ինքնությունը պարզված է:
Ըստ ռուսական աղբյուրների, նրանք Ռուսաստանի հատուկ
ծառայությունների եւ իրավապահների կողմից վերջին շրջանում սպանված
դաղստանցի գրոհայինների այրիներ են: